لاہور: (دنیا نیوز) ملکی سیاسی صورتحال کے بعد حکومتی اتحادیوں اور اپوزیشن کے بعد ترین گروپ کی غیر رسمی ملاقات ہوئی۔
ترین گروپ کے ارکان ماڈل ٹاون میں رہائش گاہ پر مل بیٹھے، ملاقات میں نعمان لنگڑیال، زوار وڑائچ ، عون چودھری، سلمان نعیم، لالہ طاہر، خرم لغاری، اسحق خاکوانی، فیصل حیات جبوانہ اور اجمل چیمہ نے بھی شرکت کی۔
غیر رسمی ملاقات کے دوران اہم امور پر مشاورت کی گئی، ترین کے حامی ارکانِ اسمبلی نے آئندہ لائحہ عمل کے لئے مشاورت کی اور موجودہ صورتحال پر تبادلہ خیال کیا گیا۔
ترین گروپ کے ہم خیال ارکان نے اپوزیشن اور حکومتی اتحادیوں کی ملاقاتوں پر تبادلہ خیال کیا، مسلم لیگ ن اور پیپلز پارٹی کے ہونے والے رابطوں پر بھی بات چیت کی گئی۔
ذرائع کے مطابق مسلم لیگ ن اور پیپلز پارٹی کی قیادت ترین گروپ سے ملاقات کی خواہشمند ہے، جہانگیر ترین نے اپنے کارڈز سینے سے لگا لئے، صورتحال کا مزید جائزہ لینے کا فیصلہ کیا گیا ہے۔
ذرائع کے مطابق ترین گروپ کے رہنماؤں ناے غیر حاضر دوستوں سے فون پر بھی مشاورت کی، گروپ کے ارکان کو پی ٹی آئی کے سینئر رہنما جہانگیر ترین کی حتمی پالیسی کا انتظار ہے۔
ذرائع کے مطابق فی الحال اراکین پارٹی کے ساتھ کھڑے رہنے کا موقف اختیار کریں گے، اپوزیشن کے حتمی کارڈز سامنے آنے کے بعد ترین اپنا لائحہ سامنے لائے گا۔
