لاہور: (دنیا نیوز) شمالی وزیر ستان کے علاقہ میرانشاہ میں خودکش دھماکے کے نتیجے میں تین سکیورٹی اہلکار اور تین معصوم بچے شہید ہو گئے۔
آئی ایس پی آر کے مطابق شہدا میں لانس حوالدار زبیر قادر، سپاہی عزیر اسفر، قاسم مقصود شامل ہیں جبکہ شہید ہونے والے بچوں کے نام احسن عمر 8 سال، احمد حسن عمر 11 سال اور انعم عمر 4 سال بتائے گئے ہیں۔
دہشت گردی کے واقعے کے بعد سکیورٹی فورسز نے علاقے کو گھیرے میں لے کر ناکہ بندی کر دی جبکہ سرچ آپریشن بھی شروع کر دیا گیا ہے۔ سکیورٹی ایجنسیوں نے دھماکے کے مقام سے شواہد اکٹھے کرنے شروع کر دیئے، سہولت کاروں کے خلاف بھی تحقیقات جاری ہیں۔
وزیراعظم شہبازشریف نے شمالی وزیرستان کےعلاقے میرانشاہ میں خودکش دھماکے کی شدید مذمت کی۔ انہوں نے شہدا کے خاندانوں سے ہمدردی کا اظہار کرتے ہوئے کہا کہ افواج پاکستان کی عظیم قربانیاں ہماری تاریخ کا سنہری باب ہیں، معصوم بچوں کے قاتل اسلام اور انسانیت دونوں کے دشمن ہیں۔
دوسری جانب پشاور کے علاقے بٹّہ تل بازار میں فائرنگ کر کے 2 سکھ تاجروں کو قتل کر دیا گیا، نامعلوم افراد نے رنجیت سنگھ اور کول جیت سنگھ کو ان کی دکان پرگولیوں کا نشانہ بنایا۔ مقتولین کی بٹّہ تل بازار میں مصالحہ جات کی دکان تھی۔پولیس نے شواہد اکٹھے کر کے کارروائی شروع کر دی۔
