پشاور: (دنیا نیوز) خیبرپختونخوا کو پنجاب سے آٹے کی ترسیل میں درپیش مسائل حل نہ ہو سکے، پنجاب میں چیک پوسٹوں پر آٹے کے ٹرک روکنے کی وجہ سے پشاور میں صرف چند دنوں کا سٹاک رہ گیا، آٹا ڈیلرز سمیت شہری بھی پریشان ہوگئے۔
پشاورمیں آٹے کی بڑی مارکیٹ رام پورہ سمیت دلہ زاک روڈ اور اشرف روڈ پر صرف چند روز کا سٹاک رہ گیا ہے، پنجاب سے منگوائے جانیوالے آٹے کو چیک پوسٹوں پر روکنے اور واپس کرنے کے باعث قیمتوں میں بھی اضافہ ہوا ہے، 20 کلو کا تھیلا 1300 سے بڑھ کر 1400 روپے کا ہوگیا ہے۔
آٹا ڈیلروں کا کہنا ہے کہ پنجاب میں چیک پوسٹوں پر بلاوجہ آٹے کو روکا جا رہا ہے، مسائل کے حوالے سے متعلقہ حکام کو بھی آگاہ کیا گیا ہے لیکن معاملہ حل نہیں ہو رہا۔
خیبرپختونخوا اور پنجاب حکومت کے درمیان معاملات حل نہ ہونے سے بحران کے علاوہ آٹے کی قیمقوں میں بھی مزید اضافے کا امکان ہے۔
