لاہور: (دنیا نیوز) وزیراعلی پنجاب حمزہ شہباز نے کہا ہے کہ عوام کو مہنگائی سے ریلیف فراہم کریں گے، صوبے کے عوام کے لئے آٹا ، چینی اور گھی سستا کرنے کا فیصلہ کر لیا۔
وزیر اعلی پنجاب حمزہ شہباز صوبے کے عوام کو ریلیف دینے کیلئے متحرک ، ان کا کہنا تھا کہ میرے بھائی بہن مشکل میں ہیں، فوری ریلیف ان کا حق ہے۔ خصوصی ریلیف پیکیج سے عام آدمی کی مشکلات میں کمی ہو گی۔ قیمتوں میں اتنی کمی کی جائے جس سے عام آدمی کو حقیقی ریلیف مل سکے۔ صوبے کے عوام کے ساتھ کھڑا ہوں۔ 15 روز گزر چکے، ریلیف پیکیج کو آج ہی حتمی شکل دی جائے۔ وزیر اعلی حمزہ شہباز نے مانیٹرنگ کا فول پروف میکنزم تشکیل دیئے کی ہدایت بھی دی۔
وزیر اعلی پنجاب کی زیر صدارت اجلاس میں چیف منسٹرز ریلیف پیکیج کو حتمی شکل دینے کے لئے تجاویز کا جائزہ لیا گیا۔ اراکین پنجاب اسمبلی سردار اویس لغاری، خواجہ عمران نذیر، بلال یاسین، رمضان صدیق بھٹی، ٹکٹ ہولڈر حافظ محمد نعمان، مسلم لیگ ن کے رہنما عطا تارڑ، پرنسپل سیکرٹری وزیر اعلی، محکمہ زراعت، خوراک، صنعت اور خزانہ کے سیکرٹریز و متعلقہ حکام نے اجلاس میں شرکت کی۔
