اسلام آباد: (دنیا نیوز) الیکشن کمیشن آف پاکستان نےسیلاب سے متاثرہ بلوچستان کے چار اضلاع میں پولنگ کا شیڈول جاری کر دیا ان اضلاع میں پولنگ 27 ستمبر کو ہوگی انتظامات مکمل کر لئے گئے ہیں۔
الیکشن کمیشن آف پاکستان کے جاری کردہ بیان کے مطابق چار اضلاع کی 11یونین کونسلوں کی 65 وارڈز میں پولنگ 27ستمبرکو ہوگی۔۔ ان میں ضلع موسیٰ خیل کی چار یونین کونسلوں کی 30، ضلع دکی کی دو یونین کونسلوں کی12وارڈزجبکہ ضلع مستونگ کی چار یونین کونسلوں کی 22 ، لورالائی کی ایک یونین کونسل کے ایک وارڈ شامل ہیں۔
ان وارڈز میں 28 اگست کو ہونے والے ضمنی بلدیاتی انتخابات سیلاب کے باعث ملتوی ہوئے تھے۔ 27 ستمبر 2022 کو ہونے والے انتخابات کے لئے انتظامات مکمل کر لئے گئے ہیں اس سلسلے میں تمام حلقوں میں مجموعی طورپر 67پولنگ اسٹیشن قائم کئے گئے ہیں۔
