اسلام آباد: ( دنیا نیوز ) پاکستان پیپلز پارٹی (پی پی پی) کے رہنما اور سابق چیئرمین سینیٹ رضا ربانی نے آئینی تقرریوں پر وزیراعظم کا صوابدیدی اختیار ختم کرنے کا مطالبہ کردیا ہے۔
اس حوالے سے رضا ربانی نے کہا کہ آئینی طریقے سے تقرریوں کے حوالے سے صوابدیدی اختیار کو ختم ہونا چاہیے، صوابدیدی اختیار کے باعث تقرری سیاست کی نظر ہو جاتی ہے، یہ اختیار آئینی عہدے اور ادارے کے لیے بدنامی کا باعث بنتا ہے۔
انہوں نے مزید کہا کہ ایک سیاسی جماعت نے اپنے ایجنڈا کے لیے آرمی چیف کی تقرری کے وقت ایسا کیا، آئین کے آرٹیکل 175 اے کی شق 3 کے تحت سب سے سینئر جج چیف جسٹس مقرر ہوتا ہے، آرمڈ فورسز چیف کی تقرری کے حوالے سے آئین کے آرٹیکل 243 میں بھی ترمیم کی جائے، متعلقہ فورس کے سینئر ترین افسر کو چیف آف سٹاف مقرر کیا جائے۔
ان کا کہنا تھا کہ ترمیم سے کمانڈ کی تبدیلی متنازع نہیں ہوگی، اس سے وزیر اعظم اپنے صوبدیدی اختیار سے دستبردار ہو جائیں گے۔
