لاہور: (دنیا نیوز) وزیر اعلیٰ پنجاب چودھری پرویز الٰہی نے کہا ہے کہ وکلاء برادری کی فلاح وبہبود کو ہمیشہ مقدم رکھا ہے، عام آدمی کو انصاف کی فراہمی کیلئے وکلاء برادری کا کردار کسی سے ڈھکا چھپا نہیں، حکومت وکلاء برادری کو دست و بازو سمجھتی ہے۔
وزیر اعلیٰ پنجاب سے سپریم کورٹ بار ایسوسی ایشن کے صدر عابد زبیری کی سربراہی میں وفد نے ملاقات کی، چودھری پرویزالہٰی نے عابد زبیری کو سپریم کورٹ بار ایسوسی ایشن کے لئے 10 کروڑ روپے کی گرانٹ کا چیک دیا۔
وزیراعلیٰ پنجاب چودھری پرویز الہٰی کا کہنا تھا کہ وکلاء برادری کی فلاح وبہبود کو ہمیشہ مقدم رکھا ہے، عام آدمی کو انصاف کی فراہمی کیلئے وکلاء برادری کا کردار کسی سے ڈھکا چھپا نہیں، وکلاء برادری کی فلاح وبہبود کیلئے مزید اقدامات بھی کئے جا رہے ہیں، میرے دروازے آپ کے لئے ہمہ وقت کھلے ہیں۔
سپریم کورٹ بارایسوسی ایشن کے وفد نے گرانٹ چیک دینے وزیر اعلیٰ چودھری پرویزالہٰی سے تشکر کا اظہار کیا، صدر سپریم کورٹ بار عابد زبیری نے کہا کہ وکلاء برادری کو جتنی عزت اور احترام آپ نے دیا ہے اس کی مثال ماضی میں نہیں ملتی، آپ کے دور میں وکلاء برادری کی فلاح و بہبود کے لئے حقیقی معنوں میں کام ہو رہا ہے۔
صوبائی وزیر قانون خرم شہزاد ورک، ایڈووکیٹ جنرل پنجاب احمد اویس، صوبائی مشیر عامر سعید راں، سپریم کورٹ بارایسوسی ایشن کے سیکرٹری مقتدرشبیر، ممبر محسن بیگ، صائم چودھری،،عمران خان کے بھانجے ایڈووکیٹ حسان نیازی، صوبائی سیکرٹری قانون اوردیگر وکلاء بھی اس موقع پر موجود تھے۔
