اسلام آباد: (دنیا نیوز) وزیر منصوبہ بندی احسن اقبال کے زیر صدارت سینٹرل ڈویلپمنٹ ورکنگ پارٹی کا اجلاس ہوا، سی ڈی ڈبلیو پی نے 22 ارب 16 کروڑ روپے کے سات ترقیاتی منصوبوں کی منظوری دے دی۔
سی ڈی ڈبلیو پی نے بلوچستان کیلئے قومی تحفظ خوراک کے 1 ارب 10 کروڑ روپے کے منصوبے کی منظوری دی، سماجی شعبے میں صحت، غذا، تعلیم کے منصوبوں کیلئے 4 ارب 82 کروڑ روپے کی منظوری دی گئی۔
اجلاس میں قائداعظم یونیورسٹی میں گرلز ہاسٹل میں تحقیق کی سہولت کے منصوبے کیلئے 3 ارب 86 کروڑ روپے سے زائد کی منظوری دی گئی جبکہ کنگ سلمان بن عبد العزیز ہسپتال ترلائی کیلئے 2 ارب 49 کروڑ روپے منظور کیے گئے۔
اس کے علاوہ گلگت شہر کے نکاسی آب کے منصوبے کیلئے 4 ارب 98 کروڑ روپے سے زائد کی منظوری دی گئی جبکہ 4 ارب 66 کروڑ 97 لاکھ روپے سے گوادر پورٹ نیوی گیشن چینل کی کھدائی کا منصوبہ منظور کیا گیا۔
