اسلام آباد: (دنیا نیوز) وفاقی وزیر خزانہ اسحاق ڈار نے کہا ہے کہ عمران خان معیشت کی بدحالی اور مہنگائی کے ذمہ دار ہیں، نیازی صاحب آپ نے جھوٹ بولا اور غلط اعداد و شمار پیش کئے، موجودہ حکومت آپ کی خرابیاں درست کر رہی ہے۔
نیوز کانفرنس سے خطاب کرتے ہوئے اسحاق ڈار نے کہا کہ مانتا ہوں عمران خان کے دور میں ایکسپورٹ میں اضافہ ہوا، باقی ہر چیز کا عمران نے بیڑہ غرق کیا، عمران دور میں قرضوں میں بے پناہ اضافہ ہوا، عمران خان نے چار سالہ دور میں 75 فیصد قرضوں میں اضافہ کیا، عمران خان بات کرنے سے پہلے حقیقت کو سامنے رکھا کریں۔
وفاقی وزیر خزانہ نے کہا کہ عمران خان نے کرنٹ اکاؤنٹ خسارے کےحوالے سے گمراہ کرنے کی کوشش کی، عمران خان باربارغلط بیانی کرتے ہیں، لائیو مناظرہ کر لیں، بحث کر لیتے ہیں، آئی ایم ایف معاہدہ ہم نے نہیں آپ نے کیا تھا، عمران خان نے بین الاقوامی معاہدوں کو پورا نہیں کیا، عمران خان جاتے جاتے لینڈ مائن بچھا کر گئے۔
یہ بھی پڑھیں: حکومتی اقدامات کی بدولت ملک ترقی کی جانب گامزن ہے: اسحاق ڈار
اسحاق ڈار کا کہنا تھا کہ عمران خان ڈوبتی معیشت چھوڑ کر گئے، معیشت کو بجلی کا سوئچ آن آف کر کے ٹھیک نہیں کیا جا سکتا، بہتری میں وقت لگے گا، تمام پارٹیاں سیاسی کیپیٹل کے لیے قربانیاں دے رہی ہے، نواز شریف دور میں پاکستان دنیا کی پانچویں بہترین سٹاک مارکیٹ تھی۔
انہوں نے کہا کہ عمران خان نے پاکستان کی کریڈبیلٹی کا بیڑہ غرق کیا، آپ نے کہا تھا آئی ایم ایف ڈیل کرنے سے بہتر ہے خود کشی کر لوں گا، نیازی صاحب آپ انتخابات چوری کر کے اقتدار میں آئے تھے، ہم کوشش کر رہے ہیں، پاکستان کو دوبارہ ترقی کی راہ پر لے کر جائیں گے۔
یہ بھی پڑھیں: ن لیگ کے لوگ سمجھدار، اسحاق ڈار ہر بات کا الزام مجھ پر نہیں لگا سکتے: مفتاح اسماعیل
وفاقی وزیر خزانہ نے کہا کہ ہم نے سیاست پر ریاست کو ترجیح دی، آپ نے کہا 55 لاکھ نوکریاں دیں، کوئی اعداد و شمار دکھائیں، آپ لوگوں نے گزشتہ دنوں جھوٹ کا پلندہ وائٹ پیپر جاری کیا تھا، نیازی صاحب جھوٹ بولنا کوئی اچھی بات نہیں ہے، اپنے افلاطونوں کو اکٹھا کر لیں اور مجھے جھوٹا ثابت کریں۔
نیوز کانفرنس کرتے ہوئے اسحاق ڈار نے کہا کہ مہربانی کر کے نیازی صاحب سچ بولیں، جوش خطابت میں جھوٹ مت بولیں، آپ صادق اور امین نہیں ہیں، آپ نے تو اربوں روپے کے ہیرے، گھڑیاں لیں۔
یہ بھی پڑھیں: یو اے ای نے پاکستان کا 2 ارب ڈالر کا قرض رول اوور کردیا: اسحاق ڈار کی تصدیق
وفاقی وزیر خزانہ نے کہا کہ عمران خان آپ کو شرم آنی چاہیے، آپ نے کہا میں 1999ء میں بھی معیشت تباہ کر کے چلا گیا تھا، خدا کا خوف کریں اور مجھے مت بتائیں، سویپنگ سٹیٹمنٹ نہ دیا کریں۔
