پیپلز پارٹی اور ایم کیو ایم میں پھر اختلافات، بلدیاتی حلقہ بندی میں تبدیلی کا نوٹیفکیشن جاری نہ ہو سکا

کراچی: (دنیا نیوز) ایم کیو ایم کے مطالبے پر بلدیاتی حلقہ بندی میں تبدیلی کا نوٹیفکیشن جاری نہ ہونے پر متحدہ قومی موومنٹ اور پیپلزپارٹی میں پھر اختلافات پیدا ہو گئے۔

پیپلز پارٹی نے گزشتہ ماہ ایم کیو ایم کو بلدیاتی حلقہ بندی میں تبدیلی کا نوٹیفکیشن جاری کرنے کا یقین دلایا تھا، ایم کیو ایم کے مطالبے پر ترقیاتی فنڈز کے اجرا پر بھی پیشرفت نہیں ہوئی، پیپلز پارٹی، سندھ حکومت کے رویئے پر ایم کیو ایم نے وزیراعظم کو شکایت لگا دی۔

یہ بھی پڑھیں: سیاستدان ایک دوسرے کی عزت کر کے رول ماڈل بنیں: سپیکر راجہ پرویز اشرف

ذرائع کے مطابق ایم کیو ایم نے 53 بلدیاتی یونین کمیٹیز بڑھانے کے لیے پیپلز پارٹی کو فہرست دی تھی، قانونی پیچیدگیوں کے سبب سندھ حکومت بلدیاتی حلقہ بندی تبدیل کرنے کی پوزیشن میں نہیں۔

ایم کیو ایم نے مطالبہ کیا کہ شیڈول کا جائزہ لے کر خود شماری اور گھر شماری کے لیے مختص دنوں میں اضافہ کیا جائے جس پر ن لیگ نے ایم کیو ایم کی تجویز سے اتفاق کیا ہے۔