لاہور: (دنیا نیوز) چیئرمین تحریک انصاف عمران خان کے خلاف لاہور ہائیکورٹ میں توہین عدالت کی کارروائی کے لیے درخواستیں دائر کر دی گئی۔
لاہور ہائیکورٹ میں دائر درخواستوں میں درخواست گزاروں نے عمران خان کو فریق بنایا ہے ، درخواست میں مؤقف اختیار کیا گیا ہے کہ عمران خان کی سربراہی میں عدلیہ کے خلاف منظم کیمپین چلائی جارہی ہے ، ڈپٹی اسپیکر کی رولنگ کو کالعدم قرار دینے پر ججز کے خلاف کیمپین چلائی گئی۔
درخواست میں مزید کہا گیا ہے کہ لاہور ہائیکورٹ اور اسلام آباد میں پیشی پر عمران خان جتھوں کے ساتھ عدالتوں میں پیش ہوئے، سرکاری عمارتوں کو نقصان اور نعرے بازی کرتے ہوئے عدالت میں پیش ہونا توہین عدالت ہے۔
درخواست میں مزید مؤقف اختیار کیا گیا کہ اسلام آباد کے جوڈیشل کمپلیکس پر پلان کرکے حملہ کیا گیا جس کے ماسٹر مائنڈ عمران خان تھے اور عمران خان نے عدلیہ کو پریشرائز کرنے کے لیے ورکرز کو جوڈیشل کمپلیکس بلایا لہٰذا لاہور ہائیکورٹ عمران خان کے خلاف توہین عدالت کی کارروائی کرے اور انہیں عدالت طلب کرکے جواب دہی کرے۔
واضح رہے کہ 28 فروری کو 4 کیسز میں پیشی کے لیے زمان پارک لاہور سے روانہ ہونے والے چیئرمین تحریکِ انصاف عمران خان قافلے کے ہمراہ اسلام آباد میں جوڈیشل کمپلیکس پہنچے تھے۔
