لاہور: (دنیا نیوز) رمضان المبارک میں ریلیف پیکیج کے تحت مفت آٹے کی فراہمی کی مانیٹرنگ کیلئے نگران وزیر اعلیٰ پنجاب محسن رضا نقوی خود میدان میں آگئے۔
وفاقی اور پنجاب حکومت کے رمضان ریلیف پیکیج کے تحت مفت آٹے کی فراہمی کے پروگرام کے حوالے سے ماڈل ٹاؤن کے سکول میں قائم سنٹر کا نگران وزیر اعلیٰ پنجاب نے اچانک دورہ کیا، انہوں نے سنٹر میں مفت آٹا لینے آئے شہریوں کی تصدیق اور آٹے کی فراہمی کا جائزہ لیا۔
محسن رضا نقوی نے سنٹر میں موجود مرد و خواتین سے مفت آٹے کی فراہمی کے حوالے سے درپیش مسائل کے بارے میں بھی پوچھا، اس موقع پر نگران وزیر اعلیٰ نے مفت آٹے کی فراہمی کے حوالے سے شہریوں کی شکایات کے ازالے کیلئے ڈپٹی کمشنر کو موقع پر ہی ہدایات دیں۔
نگران وزیر اعلیٰ نے کہا کہ مفت آٹے کی فراہمی میں شہریوں کو درپیش مسائل فوری حل کئے جائیں، شہریوں کی تصدیق سے آٹے کی فراہمی کا عمل کم سے کم وقت میں مکمل کیا جائے، لمبی قطاریں نہیں لگنی چاہئیں، تمام عمل کو جلد مکمل کیا جائے، یہ نیک کام ہے کوتاہی برداشت نہیں۔
