فیصل آباد: (دنیا نیوز) وزیر داخلہ رانا ثنا اللہ نے کہا ہے کہ اسمبلیاں مدت پوری کریں گی اور الیکشن مقررہ وقت پر ہوں گے، 14مئی کو الیکشن نہیں ہوں گے، الیکشن کی تیاری کر رہے ہیں، کسی سے بلیک میل نہیں ہوں گے۔
اپنے ایک بیان میں مسلم لیگ (ن) کے رہنما رانا ثنا اللہ نے کہا ہے کہ تحریک انصاف نے اپنی حکومت میں ترقیاتی کام نہیں کیے، موٹرویز پاکستان مسلم لیگ (ن) کے دور میں بنیں، ملتان سکھر اور سکھر سے کراچی تک موٹروے ہمارے دور میں شروع ہوئی، 2018 سے پہلے ملک میں موٹرویز بن رہی تھیں، ہم الیکشن جیتیں گے اور ترقی کا سفر دوبارہ شروع کریں گے۔
وزیر داخلہ رانا ثنا اللہ نے کہا کہ ملک میں سی پیک منصوبہ مسلم لیگ (ن) کے دور میں آیا، منصوبے کو 2020 میں مکمل ہونا تھا لیکن بدقسمتی سے 2018 میں پی ٹی آئی آگئی، سی پیک منصوبہ مکمل ہوتا تو آج ملک کو بحرانوں کا سامنا نہ ہوتا، جب بھی ملک میں بحرانی کیفیت سامنے آئی مسلم لیگ (ن) نے آگے بڑھ کر سنبھالا، ہمارے دور حکومت میں پاکستان ایٹمی قوت بنا۔
یہ بھی پڑھیں: عمران خان سر سے پاؤں تک جھوٹا، مکار آدمی ہے: وزیر اعظم شہباز شریف
انہوں نے مزید کہا کہ 1998 میں ایٹمی دھماکوں کے بعد بھی نواز شریف نے ملک سنبھالا، مسلم لیگ (ن) نے ملک سے دہشتگردی اور لوڈشیڈنگ کا خاتمہ کیا، ملک ترقی کر رہا تھا لیکن سازش کے تحت عمران خان کو لایا گیا، آج ثاقب نثار پی ٹی آئی کے ٹکٹ بیچ رہا ہے، ثاقب نثار پی ٹی آئی کی ٹکٹیں بیچنے کیلئے دلال بنا ہوا ہے، آڈیو لیکس نے ثاقب نثار کا کردار بے نقاب کر دیا ہے۔
وزیر داخلہ نے کہا کہ اسمبلیاں مدت پوری کریں گی اور الیکشن مقررہ وقت پر ہوں گے، الیکشن 14مئی کو نہیں ہوں گے، الیکشن کی تیاری کر رہے ہیں، کسی سے بلیک میل نہیں ہوں گے، بیٹھ کر بات چیت کرنے کیلئے تیار ہیں لیکن اصولی موقف سے پیچھے نہیں ہٹیں گے، عمران خان بدبخت ہے، بدبخت ٹولہ اس کے ساتھ ہے، یہ ایک فتنہ ہے، اس کا جلد خاتمہ ہونا چاہیے ورنہ قوم کو عذاب میں مبتلا کر دے گا۔
