اسلام آباد: (دنیا نیوز) اسلام آباد ہائی کورٹ نے چیئرمین تحریکِ انصاف عمران خان اور پی ٹی آئی کی 121 کیسز میں کارروائی روکنے کی درخواست قابلِ سماعت ہونے پر فیصلہ محفوظ کر لیا۔
چیف جسٹس اسلام آباد ہائیکورٹ عامر فاروق نے کیس کی سماعت کی، عمران خان کی جانب سے بیرسٹر سلمان صفدر عدالت میں پیش ہوئے۔
عمران خان کے وکیل نے عدالت کو بتایا کہ عمران خان کے خلاف ریکارڈ کے مطابق 127 ایف آئی آر درج ہیں، چیف جسٹس نے استفسار کیا کہ کیا 127 مقدمات پورے پاکستان میں درج ہیں، آپ نے ایف آئی آر کا ریکارڈ لاہور ہائیکورٹ میں بھی پیش کیا ہے۔
چیف جسٹس نے ریمارکس دیئے کہ یہ تاثر جائے گا کہ لاہور ہائیکورٹ یا اسلام آباد ہائیکورٹ کچھ نہیں کر رہیں، جو لاہور ہائیکورٹ نے آرڈر کیا ہے وہی آرڈر میں کروں گا، آپ صرف اسلام آباد کی حد تک بات کریں، لاہور میں جو مقدمات ہیں وہ لاہور ہائیکورٹ میں بات کریں یہاں ڈپلیکیشن نہ کریں۔
خیال رہے کہ گزشتہ روز لاہور ہائیکورٹ نے سابق وزیر اعظم عمران خان کی 121 مقدمات میں کارروائی روکنے کی درخواست پر آئندہ سماعت پر جے آئی ٹی کے سربراہ کو طلب کر لیا۔
لاہور ہائیکورٹ نے تفصیلی رپورٹ طلب کی ہے کہ عمران خان کتنے مقدمات میں نامزد ہیں اور جن کیسز میں وہ پولیس کو مطلوب ہیں ان کیسز کی تفصیلات بھی بتائی جائیں۔
