اسلام آباد: (دنیا نیوز) وزیر اعظم شہباز شریف سے مولانا فضل الرحمان کی ملاقات ہوئی جس میں سپریم کورٹ کی جانب سے عمران خان کو رہا کرنے کے حکم سے متعلق مشاورت کی گئی۔
ذرائع کے مطابق عمران خان کی گرفتاری کو غیر قانونی قرار دینے پر دونوں رہنماؤں نے تشویش کا اظہار کیا، مولانا فضل الرحمان نے سپریم کورٹ کے فیصلے سے متعلق وزیر اعظم کو اپنے شدید تحفظات سے آگاہ کیا، پی ڈی ایم سربراہ نے احتجاجی حکمت عملی سے متعلق بھی بتایا۔
یہ بھی پڑھیں: عمران خان کی رہائی: وزیر اعظم شہباز شریف کا اتحادیوں سے مشاورت کا فیصلہ
ملاقات کے دوران حکومت کی اتحادی جماعتوں کی جانب سے سپریم کورٹ کے فیصلے کے خلاف متفقہ احتجاج کرنے پر غور کیا گیا، وزیر اعظم نے دیگر اتحادی جماعتوں کے سربراہان سے بھی رابطہ کر کے ملک کی سیاسی صورتحال پر مشاورت کی۔
