لاہور/ کراچی: (دنیا نیوز)چیئرمین پاکستان تحریک انصاف عمران خان کی گرفتاری کے بعد پر تشدد ہنگاموں سے جنم لینے والے ملکی حالات کے تناظر میں اہم شخصیات کی جانب سے اپنے خیالات کا اظہار اور عوام کو پیغامات جاری کرنے کا سلسلہ جاری ہے۔
سوشل ورکر رمضان چھیپا نے کہا کہ مہذب معاشروں میں پرامن احتجاج ہوتا ہے، اپنے ہاتھوں خود کو نقصان پہنچانا کہاں کی عقل مندی ہے۔
اینکرپرسن رضوان جعفر کا کہنا تھا کہ ’’9 مئی کو ایک سیاہ دن کے طور پر یاد رکھا جائے گا، چند شرپسند عناصر نے پاکستان کو بہت نقصان پہنچایا۔‘‘
ٹی وی ہوسٹ ندا یاسر نے کہا کہ ’’عوام ہمیشہ سے پاک فوج کے ساتھ کھڑے ہیں، پاک فوج کی قربانیوں اور شہادتوں کی وجہ سے ہم آزادی کے ساتھ جی رہے ہیں، ہماری فوج ایک عظیم فوج ہے، ہمیشہ بُرے وقت میں وطن کے کام آئی ہے، ہم اپنی فوج پر اعتماد کرتے ہیں اور ان کی وجہ سے سکون کی نیند سو پاتے ہیں، اپنی رائے کا اظہار کریں لیکن پاک فوج کو بیچ میں نہ لائیں۔‘‘
دفاعی تجزیہ نگار بریگیڈیئر (ر) حارث نواز نے کہا کہ ’’کبھی بھی سیاسی شرپسندوں سے ایسی امید نہیں رکھتے تھے، پاک فوج کسی بھی سیاسی پارٹی کے ساتھ جانب داری نہیں رکھتی۔‘‘
تاجر حامد پونا والا کا کہنا تھا کہ ’’پوری قوم شرپسندوں کی وجہ سے شرمندہ ہے، بین الاقوامی سطح پر پاکستان کی ساکھ کو شدید نقصان پہنچا ہے، جو کام دشمن نہ کر سکا وہ ہمارے لوگوں نے کر دیا، ہم پاکستان سے شرمندہ ہیں۔‘‘
