کراچی: (دنیا نیوز) جاوید عالم اوڈھو کو ہٹا کر خادم حسین رند کو ایڈیشنل آئی جی کراچی تعینات کر دیا گیا ہے۔
چیف سیکرٹری سندھ کی جانب سے خادم حسین رند کو ایڈیشنل آئی جی کراچی تعینات کرنے کا نوٹیفکیشن بھی جاری کر دیا گیا ہے، جاوید عالم اوڈھو کو ایس این جی ڈی رپورٹ کرنے کی ہدایت کی گئی ہے۔
علاوہ ازیں الیکشن کمیشن کی جانب سے سندھ کی بیورو کریسی میں بھی تقرر و تبادلے کیے گئے ہیں، تقرری کے منتظر گریڈ 21 کے افسر شکیل منگنیجو کو چیئرمین پی اینڈ ڈی تعینات کرنے کی منظوری دی گئی ہے، منظور شیخ کو سیکرٹری محکمہ بلدیات لگا دیا ہے۔
عمر فاروق بلو کو سیکرٹری کچی آبادی، فیاض عباسی کو سیکرٹری محکمہ توانائی تعینات کرنے کی منظوری دے دی، منصورعباس کو سیکرٹری صحت، حسن نقوی کو پرنسپل سیکرٹری وزیر اعلیٰ تعینات کیا گیا ہے، بلال میمن کو پرنسپل سیکرٹری گورنر سندھ تعینات کرنے کی منظوری دی گئی ہے۔
الیکشن کمیشن کی جانب سے ساجد جمال ابڑو کو سیکرٹری سماجی بہبود، شارق احمد کو سیکرٹری محکمہ لیبر، اعجاز مہیسر کو سیکرٹری پبلک ہیلتھ تعینات کرنے کی منظوری دی گئی ہے، الیکشن کمیشن نے چیف سیکرٹری سندھ کو خط لکھ کر آگاہ کر دیا۔
