لاہور: (دنیا نیوز) نگران وزیر اعلیٰ پنجاب محسن رضا نقوی نے سروسز ہسپتال کی 150بیڈز پر مشتمل نئی ایمرجنسی کا افتتاح کر دیا۔
وزیر اعلیٰ کو نئے ایمرجنسی بلاک کے حوالے سے بریفنگ دی گئی، صوبائی وزراء عامر میر، ڈاکٹر جاوید اکرم، سیکرٹری صحت، سیکرٹری تعمیرات و مواصلات، کمشنر لاہور ڈویژن، سی سی پی او لاہور، پرنسپل سمز، ایم ایس سروسز ہسپتال اور متعلقہ حکام اس موقع پر موجود تھے۔
وزیر اعلیٰ پنجاب نے نئے ایمرجنسی بلاک کا دورہ کر کے مختلف شعبوں کا معائنہ کیا اور فراہم کردہ سہولتوں کا جائزہ لیا، ایمرجنسی بلاک کو انفیکشن فری کرنے کیلئے پہلی مرتبہ اینٹی بکٹیریل پینٹ کا استعمال کیا گیا جبکہ آپریشن تھیٹرز میں بھی انفیکشن فری ٹائلز نصب کی گئی ہیں۔
محسن رضا نقوی نے سرجیکل، میڈیکل، پیڈیاٹرک ایمرجنسی، سی ٹی سکین، پتھالوجی اور ریڈیالوجی لیب، فارمیسی اور دیگر شعبوں کا بھی معائنہ کیا، وزیر اعلیٰ پنجاب نے کم بلندی پر لگے سیلنگ فین کی بجائے بریکٹ فین اور چھتوں کی سیلنگ مزید بہتر کرنے کی ہدایت کی۔
وزیر اعلیٰ پنجاب نے ایمرجنسی کی صفائی ہر صورت میں برقرار رکھنے، مریضوں اور ڈاکٹروں کے واش رومز میں ہینڈ ڈرائیر، ڈاکٹرز اور نرسنگ رومز میں نئے اے سی لگانے کی ہدایت بھی کی، محسن رضا نقوی نے ایمرجنسی کے باہر نصب سمز کے پہلے جھنڈے کی پرچم کشائی کی۔
محسن رضا نقوی نے گفتگو کرتے ہوئے کہا ہے کہ انشاء اللہ اسی انداز میں تمام ہسپتالوں کی اپ گریڈیشن کی جائے گی، ہسپتالوں میں علاج معالجے کی سہولتوں کو بہتر بنانے کیلئے پوری کوشش کر رہے ہیں۔
