اسلام آباد: (دنیا نیوز) توشہ خانہ کیس کے فیصلے کے تناظر میں نااہلی کا نوٹیفکیشن جاری کئے جانے کیخلاف چیئرمین پی ٹی آئی نے اسلام آباد ہائی کورٹ سے رجوع کر لیا، سابق وزیر اعظم نے نااہلی سے متعلق الیکشن کمیشن کے نوٹیفکیشن پر حکم امتناع جاری کرنے کی استدعا کی ہے۔
اسلام آباد ہائی کورٹ میں جمع کروائی گئی درخواست میں موقف اپنایا گیا ہے کہ عدالت نے توشہ خانہ کیس میں چیئرمین پی ٹی آئی کی سزا معطل کی، اپیلوں کے حتمی فیصلے تک توشہ خانہ کیس کے فیصلے کے تناظر میں کی جانے والی کارروائیوں کو معطل / حکم امتناع قرار دیا جائے۔
درخواست میں مزید کہا گیا کہ توشہ خانہ کیس کے فیصلے کی بنیاد پر الیکشن کمیشن نے چیئرمین پی ٹی آئی کی نااہلی کا نوٹیفکیشن جاری کیا، پارٹی چیئرمین کے عہدے سے ہٹانے اور پارٹی نشان واپس لینے تک کی کارروائی شروع کی گئی۔
عدالت سے استدعا کی گئی ہے کہ توشہ خانہ کیس میں سزا معطلی کے فیصلے میں ہماری زبانی گزارشات کو بھی فیصلے کا حصہ بنایا جائے، الیکشن کمیشن کے وکیل نے سزا معطلی کی درخواست پر سماعت کے دوران وفاق کو فریق بنانے کا کہا، وفاق کا اس کیس سے کوئی لینا دینا نہیں لیکن ہمیں وفاق کو فریق بنانے پر کوئی اعتراض نہیں، وفاق کو فریق بنانے کی اجازت دی جائے۔
