اسلام آباد: (دنیا نیوز) پاکستان مسلم لیگ ن کی منشور کمیٹی کے چیئرمین سینیٹرعرفان صدیقی نے کہا کہ کسی فرد کے احتساب کو اپنے منشور کا حصہ نہیں بنائیں گے۔
پاکستان مسلم لیگ ن کی منشور کمیٹی کے چیئرمین سینیٹر عرفان صدیقی نے پارلیمنٹ ہاؤس میں صحافیوں سے گفتگو کرتے ہوئے کہا کہ مسلم لیگ ن کے آئندہ انتخابات کے منشور پر کام ہو رہا ہے، بنیادی طور پر منشور میں عوام کے مسائل کا حل دیا جائے گا۔
عرفان صدیقی نے کہا کہ بے روزگاری، غربت، مہنگائی اور دیگر مسائل کا حل ہماری ترجیح ہے، نوازشریف نے سب سے زیادہ ترجیح عدالتی اصلاحات کو دینے کی ہدایت کی، لوگوں کی زندگیاں تباہ ہوتی ہیں مگر انصاف نہیں ملتا، منشور میں زیر التوا مقدمات سے چھٹکارے، فوری اور معیاری انصاف پر بات ہو گی۔
ن لیگ کی منشور کمیٹی کے چیئرمین نے کہا کہ ماہرین قانون سے ملاقاتیں کی ہیں، صحافیوں، صنعتکاروں سے ملاقاتیں بھی ہوں گی، نوازشریف چاہتے ہیں منشور میں قابل عمل نعروں پر بات ہو، منشور میں وہ چیزیں ہوں گی جو عملی طور پر ممکن ہیں۔
عرفان صدیقی نے سابق عسکری قیادت کے احتساب بارے سوال پر کہا کہ ہم اصولی بات کریں گے، احتساب کے نعرے کا استحصال کیا گیا، کسی فرد کے احتساب کو اپنے منشور کا حصہ نہیں بنائیں گے، سابق صدر آصف زرداری کے نوازشریف مخالف بیان بارے سوال پر کہا اللہ تعالیٰ نے اپنے فیصلے زرداری صاحب سے پوچھ کر کرنا ہیں تو ٹھیک ہے۔
ن لیگ کی منشور کمیٹی کے چیئرمین نے مزید کہا کہ پکڑ دھکڑ کا سلسلہ چیئرمین پی ٹی آئی نے شروع کیا، انہی کے ساتھ ختم ہو گیا۔
