لاہور: (دنیا نیوز) تحریک انصاف کے انٹرا پارٹی الیکشن کل منعقد کیے جائیں گے، بیرسٹر گوہر علی خان کا بلامقابلہ چیئرمین تحریک انصاف منتخب ہونے کا امکان ہے۔
ذرائع کے مطابق انٹرا پارٹی الیکشن مرکز اور صوبائی سطح کی قیادت کے لیے منعقد کیے جائیں گے، الیکشن میں ووٹرز آن لائن ایپ کے ذریعے اپنا حق رائے دہی استعمال کریں گے، آج رات تک تمام امیدواران کے نام جاری کر دئیے جائیں گے۔
یہ بھی پڑھیں: پی ٹی آئی انٹرا پارٹی انتخابات: کاغذات نامزدگی کی وصولی کا عمل مکمل
ذرائع کے مطابق تحریک انصاف کے انٹرا پارٹی الیکشن میں تحریک انصاف کے مرکزی صدر کی نشست پر چودھری پرویزالٰہی امیدوار ہوں گے، مرکزی سیکرٹری پر عمر گوہر ایوب بھی انٹرا پارٹی الیکشن میں امیدوار ہوں گے۔
پنجاب کی صدارت کے لیے ڈاکٹر یاسمین راشد انٹرا پارٹی انتخاب میں حصہ لیں گی، پنجاب کی جنرل سیکرٹری کی نشست پر حماد اظہر میدان میں ہوں گے، خیبر پختونخوا کی صدارت کے لیے علی امین گنڈا پور فیورٹ امیدوار ہیں، خیبر پختونخوا کی سیکرٹری جنرل کی نشست پر علی اصغر امیدوار ہوں گے۔
ذرائع کے مطابق پی ٹی آئی سندھ کے صدر کے طور پر حلیم عادل شیخ امیدوار ہیں، سندھ کے سیکرٹری کی نشست کے امیدوار ایڈووکیٹ علی اصغر ہوں گے۔
