لاہور: (دنیا نیوز) پیپلزپارٹی کے سابق رہنما اور ماہر قانون سردار لطیف کھوسہ نے پاکستان تحریک انصاف میں شمولیت اختیار کر لی۔
لاہور میں پریس کانفرنس کرتے ہوئے سردار لطیف کھوسہ کا کہنا تھا کہ آج خوشی کا سفر کرنے کیلئے یہ قدم اٹھایا ہے، ریاست ماں ہوتی ہے، آج نہ چادر چار دیواری کا تحفظ ہے اور نہ جان و مال کا، میں آج نفرتوں کو ختم کر کے ایک نئے سفر کی دعوت دیتا ہوں۔
انہوں نے کہا کہ اللہ تعالیٰ نے ایک خوبصورت شکل میں پاکستان کا خطہ دیا ہے، پاکستان کے عوام کو ہی مقتدر کرنا آئین کی منتہا ہے، پاکستان کے عوام ہی ریاست ہیں، آرٹیکل 7 میں عوام کے علاوہ کوئی ریاست نہیں، ریاست کی روح ہی عوام کے نمائندوں میں ہے۔
سابق گورنر پنجاب کا کہنا تھا کہ تمام چیزوں کا حل آئین میں موجود ہے، جب جب آئین سے روگردانی کی گئی نقصان اٹھانا پڑا، جمہور عوام ہے ، پاکستان جمہور اور جمہوریت پر بنا، پاکستان گولیاں چلا کر معرض وجود میں نہیں آیا، 1973 کا آئین ہی آج ہمیں جوڑے ہوئے ہے۔
رہنما تحریک انصاف نے کہا کہ آئین سے انحراف ضیاء الحق نے کیا، آج خمیازہ بھگت رہے ہیں، ضیاء الحق نے مولوی مشتاق کے ساتھ مل کر عظیم قائد ذوالفقار علی بھٹو کو شہید کر کے لحد میں اتاردیا، ہم کب تک وزرائےاعظم کو اقتدار سے ہٹا کر کھیل تماشہ کرتے رہیں گے؟
ان کا کہنا تھا کہ عزت، ذلت، رزق اللہ کے ہاتھ میں ہے، میں نے وکالت اور سیاست عبادت سمجھ کر کی ہے، سب سے پہلے میری ذمہ داری دھرتی ماں کے ساتھ ہے، آئین کی پاسداری کرنے والا امر ہوتا ہے، عدلیہ کی ذمہ داری ہے کہ وہ انصاف فراہم کرے۔
لطیف کھوسہ نے کہا کہ یہ ادارے ہمارے ادارے ہیں، یہ فوج ہماری فوج ہے، قباحتیں صرف اس وقت ہوتی ہیں جب اختیارات سے تجاوز کیا جاتا ہے، پاکستان کی سر زمین بے آئین بن چکی ہے، پی ٹی آئی کو لیول پلیئنگ فیلڈ نہیں دی جا رہی۔
ان کا مزید کہنا تھا کہ 25 کروڑ عوام عدلیہ کی جانب دیکھ رہے ہیں، چیف جسٹس کو خراج تحسین پیش کرتا ہوں انہوں نے الیکشن پر ایکشن لیا، عدلیہ کو چاہیے اپنے فیصلے پر عملداری کرائے، آئین ہی کے اندر چیزیں موجود ہیں، عدالت آئین پر من وعن عمل کرے، عدلیہ نے آئین پر حلف اٹھایا ہوا ہے۔
