مظفر آباد: (دنیا نیوز) نگران وزیراعظم انوار الحق کاکڑ نے کہا ہے کہ قائداعظم نے واضح کیا کہ کشمیر کے بغیر پاکستان نامکمل ہے، پاکستان اور کشمیری اٹوٹ رشتوں میں بندھے ہیں۔
نگران وزیراعظم انوارالحق کاکڑ نے آزاد کشمیر قانون ساز اسمبلی سے خطاب کرتے ہوئے کہا کہ ہمارے دل ایک ساتھ دھڑکتے ہیں، مقبوضہ جموں و کشمیر میں جو کچھ ہورہا ہے اس سے ہم لاتعلق نہیں رہ سکتے، مقبوضہ جموں و کشمیر میں واحد دہشتگرد بھارت ہے۔
یہ بھی پڑھیں: انتخابات میں التوا کے دعوے غلط ثابت ہوئے: نگران وزیر اعظم
انوارالحق کاکڑ نے مزیدکہاکہ بھارت کشمیری عوام کی خواہشات کے خلاف یکطرفہ طور پر کوئی حتمی حل مسلط نہیں کر سکتا، کشمیر ہماری خارجہ پالیسی کی اہم ترین ترجیحات میں سے ایک ہے۔
انہوں نے کہا کہ قائد اعظم محمد علی جناحؒ نے قرار دیا تھا کہ کشمیر کے بغیر پاکستان نامکمل ہے یہ محض دعویٰ نہیں بلکہ حقیقت برمبنی ہے، جغرافیائی قربت، مشترکہ تاریخ اور عقیدہ اس بندھن کے اہم عناصر ہیں، ہمارے تہوار ایک ہیں، دل ایک ہی تال پر دھڑکتے ہیں اور ہماری رگوں میں ایک ہی خون رواں ہے۔
یہ بھی پڑھیں: تمام جماعتوں سے یکساں سلوک ہو رہا، کسی کو ٹارگٹ نہیں کر رہے: نگران وزیر اعظم
نگران وزیراعظم نے مزید کہا کہ کوئی بھی کشمیریوں کی مرضی کے بغیر یہاں کا کوئی بھی حل مسلط نہیں کرسکتا، کشمیر کاز کے لئے ہمارے عزم پختہ ہیں، کشمیر ہمیشہ سے پاکستان کی خارجہ پالیسی میں اہم رہا ہے، ہمارے معاشرے کے اہم طبقات اور عوام کشمیریوں کے ساتھ کھڑے ہیں۔
انوارالحق کاکڑ نے کہا کہ ہم یو این او کی قرارداد کے مطابق کشمیر کے لئے ہر طرح کی حمایت کو اپنا فرض سمجھتے ہیں اسی لئے عالمی فورم پر ہمیشہ کشمیریوں کی حمایت کی ہے۔
