پشاور: (دنیانیوز) خیبرپختونخوا میں بارش اوربرفباری کاسلسلہ جاری ہے ، چھتیں گرنے اور مختلف حادثات میں 7 افراد جاں بحق ہوگئے۔
ڈی جی ریسکیو پشاور کے مطابق جاں بحق افراد میں 5 بچے، خاتون اور مرد شامل ہیں جبکہ پانچ زخمی ہوئے ہیں ، چھتیں گرنے کے واقعات کے دوران متعدد جانور بھی ہلاک ہوئے، یہ واقعات پشاور، لوئر دیر اور باجوڑ میں پیش آئے۔
ڈی جی ریسکیو کا بتانا ہے کہ مختلف اضلاع میں چھتیں گرنے سے مالی نقصانات بھی ہوئے۔
کے پی کے علاقے لوئر دیر میں مٹی کا تودہ گھر پر گرنے سے ملبے تلے دب کر 3 افراد جاں بحق ہوگئے، اسی طرح مالاکنڈ کے علاقے بٹ خیلہ میں تیزبارش کے باعث مکان کی چھت گرنے سے ملبے تلے دب کر ماں کمسن بچی سمیت جاں بحق ہوگئی ۔
مالاکنڈ کوپر کے علاقے میں مکان کی چھت گرنے سے ملبے تلے دب کر بچی جاں بحق ہوگئی، ملبے تلے دبے تین بچوں کو بھی زخمی حالت میں نکال کر ہسپتال منتقل کردیا گیا۔
یہ بھی پڑھیں:لوئر دیر: مٹی کا تودہ گھر پر گرنے سے 3 افرادجاں بحق
ضلع خیبر میں آج تیسرے روز بھی بارش اور برفباری کا سلسلہ جاری ہے، صوبائی دارالحکومت میں وقفے وقفے سے ہونے والی بارش سے نشیبی علاقے زیرآب آ گئے، دوسری جانب بالائی علاقوں میں شدید بارش اور برفباری کی وجہ سے لینڈ سلائیڈنگ اور شاہراہیں بند ہونے سے معمولات زندگی متاثرہوئے ہیں ۔
محکمہ موسمیات نے آئندہ 24 گھنٹوں میں مزید بارش کا سلسلہ جاری رہنے کی پیشگوئی کی ہے۔
