اسلام آباد: (دنیا نیوز) ڈسٹرکٹ اینڈ سیشن عدالت اسلام آباد نے بانی پی ٹی آئی و دیگر پارٹی قیادت پر آزادی مارچ سے متعلق تھانہ آبپارہ میں درج 2 مقدمات میں درخواستِ بریت پر فیصلہ محفوظ کر لیا۔
جوڈیشل مجسٹریٹ یاسر محمود نے عمران خان، شاہ محمود قریشی اور فیصل جاوید کی درخواست بریت پر سماعت کی، پی ٹی آئی وکلا سردار مصروف، آمنہ علی اور مرزا عاصم بیگ عدالت میں پیش ہوئے۔
دورانِ سماعت پی ٹی آئی کے وکلاء نے بانی پی ٹی آئی عمران ، شاہ محمود قریشی اور فیصل جاوید کی درخواستِ بریت پر دلائل مکمل کئے۔
وکیل سردار مصروف نے دلائل دیئے کہ ایف آئی آر مجاز اتھارٹی کی جانب سے درج نہیں کرائی گئی، اگر ٹرائل ہو بھی جائے تو سزا ہونے کے امکانات نہیں ہیں، پراسیکیوشن کے پاس کوئی ثبوت موجود نہیں سوائے جھنڈوں کے۔
بعد ازاں عدالت نے تھانہ آبپارہ کے دونوں مقدمات میں درخواست بریت پر فیصلہ محفوظ کر لیا۔
