لاہور: (دنیا نیوز)سپیکر پنجاب اسمبلی ملک محمد احمد خان نے کہا ہے کہ بانی پی ٹی آئی عمران خان کا آرمی چیف کو خط لکھنے کا مطلب ترلے کرنے کی آخری حد ہے۔
پنجاب اسمبلی کے احاطہ میں صحافیوں سے گفتگو کرتے ہوئے سپیکر ملک احمد خان کاکہنا تھا کہ خط کا مفصل جواب وصول کنندہ کی جانب سے آ چکا ہے، جن کو خط لکھا گیاانہوں نے کہاکہ میں اس خط کو پڑھوں گا بھی نہیں اور ویسے ہی وزیر اعظم کو بھیج دوں گا، اگر خط وصول کنندہ نہیں پڑھیں گے تو وزیر اعظم بھی نہیں پڑھیں گے۔
انہوں نے کہا کہ یہ خط انہی خطوط کی ایک کڑی ہے جب ان کی صوبوں میں حکومت تھی اور وزیر خزانہ شوکت ترین ملک کو ڈیفالٹ کروانے پر تلے ہوئے تھے، ماضی میں ان کی پہلے بھی کوشش رہی کہ ملک ڈیفالٹ کا شکار ہوجائے، ان کا ایجنڈا صرف ایک تھا کہ ملک ڈیفالٹ کر جائے، یہ پاکستان میں سیاسی عدم استحکام ، عدالتوں میں تقسیم اور معاشی عدم استحکام لانا چاہتے تھے۔
ملک محمد احمد خان کا کہنا تھا کہ آج ان کے حالات دیکھ لیں عمر ایوب اب آئی ایم ایف کو خط لکھ رہے ہیں، بانی پی ٹی آئی اور ان کے حواریوں کی حرکتوں پر پریشان ہوں کہ آخر ان کا ایجنڈا کیا ہے، عمرایوب جو آئی ایم ایف کو خط لکھ رہے ہیں اس کی کیا وجوہات ہیں؟
