پشاور: (دنیا نیوز) وزیراعلیٰ خیبرپختونخوا علی امین گنڈا پور نے کہا ہے کہ بانی پی ٹی آئی عمران خان ریاست کی مخالفت کے باوجود قوم اور ہمارے بچوں کے مستقبل کیلئے مقابلہ کررہے ہیں۔
میڈیا سے گفتگو کرتے ہوئے وزیراعلیٰ خیبرپختونخوا علی امین گنڈا پور کا کہنا تھا کہی کچھ وجوہات کی بنا پر پاکستان ویسی ترقی نہیں کرسکا جس طرح کی بنیاد رکھی گئی تھی، وہی قومیں اورملک آگے بڑھتے ہیں جو انسانی حقوق کا خیال رکھتے ہیں، کامیاب وہی ہوتا ہے جو کسی اور کی کامیابی پر خوش ہو۔
انہوں نے کہا کہ بانی پی ٹی آئی کو ملا تو ان سے بات چیت کے دوران میں نے ان سے کہا دو چیزیں بیماری ہیں جن کو کوئی بیماری سمجھتا ہی نہیں، عدم تحفظ اور حسد کی وجہ سے بہت سے لوگ اپنے اندر تباہ ہورہےہوتے ہیں علاج نہیں کراتے، کوئی کامیاب ہورہا ہے تو اس پر خوش ہونا چاہیے۔
یہ بھی پڑھیں: آڈیو لیک کیس میں علی امین گنڈاپور کے وارنٹ گرفتاری برقرار
علی امین گنڈاپور کا مزید کہنا تھا کہ بانی پی ٹی آئی پوری ریاست کی مخالفت کے باوجود قوم اور ہمارے بچوں کیلئے مقابلہ کررہے ہیں، عمران خان کے وژن کے مطابق ہمارا ریونیو 55 فیصد بڑھ گیا ہے، خیبرپختونخوا میں ہر محکمے کی بہتری کیلئے کام کریں گے، ہم خیبرپختونخوا کے عوام کی بہتری کیلئے کوئی کسر نہیں چھوڑیں گے۔
