کراچی :(دنیا نیوز) ای پاسپورٹس بنوانے کے خواہشمند پاکستانی شہریوں کے لیے اچھی خبر، 2 نئے ای پاسپورٹ پرنٹرز کراچی پہنچ گئے۔
ذرائع کے مطابق جرمنی سے 6 نئے ڈیسک ٹاپ پرنٹرز بھی شہر قائد پہنچے، نئے پرنٹرز کی انسپکشن اور ڈیلیوری کے لیے ڈی جی پاسپورٹس جرمنی پہنچے، مصطفی جمال قاضی نے پرنٹرز کے تیکنیکی ماہرین سے بھی ملاقات کی۔
ڈی جی پاسپورٹس کا کہنا تھا کہ نئے پرنٹرز ایک گھنٹے میں ایک ہزار تک پاسپورٹ پرنٹ کرنے کی صلاحیت رکھتے ہیں، نئے پرنٹرز کی مدد سے ملک بھر میں ای پاسپورٹس کی پرنٹنگ صلاحیت میں اضافہ ہوگا۔
علاوہ ازیں مصطفی جمال قاضی نے مزید کہا کہ ڈیسک ٹاپ پرنٹرز فنکشنل ہونے کے بعد پاسپورٹ کی فراہمی مزید تیز ہوگی۔
