سربراہ پاک بحریہ سے کمانڈر بحرین نیشنل گارڈ کی ملاقات، باہمی دلچسپی کے امور پر گفتگو

Published On 15 March,2025 08:41 pm

راولپنڈی :(دنیا نیوز) کمانڈر بحرین نیشنل گارڈ جنرل شیخ محمد بن عیسیٰ نے سربراہ پاک بحریہ ایڈمرل نوید اشرف سے ملاقات کی جہاں باہمی دلچسپی کے امور اور خطے کی سکیورٹی صورتحال پر تبادلہ خیال کیا گیا۔

پاک فوج کے شعبہ تعلقات عامہ آئی ایس پی آر کے مطابق کمانڈر بحرین نیشنل گارڈ جنرل شیخ محمد بن عیسیٰ نیول ہیڈکوارٹرز پہنچے اور سربراہ پاک بحریہ ایڈمرل نوید اشرف سے ملاقات کی۔

ملاقات کے دوران نیول چیف نے خطے میں امن و سلامتی کےلیے پاک بحریہ کے اقدامات پر روشنی ڈالی، اس دوران کمانڈر بحرین نیشنل گارڈ نے بحری سکیورٹی کےلیے پاک بحریہ کی کاوشوں کو سراہا۔

ملاقات کے دوران پاکستان اور بحرین کے درمیان دفاعی تعلقات کے دائرہ کار کو مزید مضبوط بنانے کے عزم کا اعادہ کیا گیا۔

آئی ایس پی آر کا کہنا ہے کہ کمانڈر بحرین نیشنل گارڈ کے دورے سے دونوں ممالک بالخصوص مسلح افواج کے درمیان تعلقات کو مزید فروغ ملے گا۔