لاہور: (دنیا نیوز) وزیراعلیٰ پنجاب مریم نواز شریف نے کہا ہے کہ پنجاب ڈیجیٹل ٹیکنالوجی اور آن لائن ٹریڈ میں تیزی سے آگے بڑھ رہا ہے۔
وزیراعلیٰ پنجاب مریم نواز شریف سے امریکی صدر ڈونلڈ ٹرمپ کے حمایت یافتہ ادارے "ورلڈ لبرٹی فنانشل" کے اعلیٰ سطح کے وفد نے ملاقات کی جس میں اہم امور پر تبادلہ خیال کیا گیا۔
ورلڈ لبرٹی فنانشل کے وفد میں زجری فوک مین، زجری وٹ کوف اور چیس ہیرو شامل تھے، ملاقات میں پاکستان کرپٹو کونسل کے سربراہ بلال بن ثاقب بھی موجود تھے، ملاقات میں بلاک چین اینوویشن ٹوکنائزیشن، رئیل ورلڈ ایسٹس اورسٹیبل ایپلی کیشن پر تبادلہ خیال کیا گیا۔
ملاقات میں بلاک چین ٹیکنالوجی کے فروغ کے منصوبے پر غور کیا گیا، معدنیات، ایگریکلچر سمیت پاکستان کے وسیع قدرتی وسائل، حقیقی اثاثوں کی ٹوکنائزیش کا جائزہ لیا گیا۔
اس موقع پر ڈیجیٹل لین دین میں شفافیت، بہتر کارکردگی اور سکیورٹی امور کے لئے سٹیبل کوائن سلوشن کے نفاذ پر بات چیت بھی کی گئی، ملاقات میں ترسیلات زر، مالیاتی لین دین اور عالمی تجارت کے بہتر فریم ورک کی ضرورت پر زور دیا گیا۔
ملاقات کے دوران پاکستان کے معاشی اور مالیاتی نظام کو ڈی سینٹرلائزڈ فنانس ماڈل سے مربوط کرنے پر اتفاق رائے کیا گیا جبکہ وزیراعلیٰ پنجاب مریم نواز شریف نے ورلڈ لبرٹی فنانشل کے وفد کے اختراعی معاشی نظریات کو سراہا۔
وزیراعلیٰ مریم نواز شریف نے پنجاب کو ڈیجٹیل اینوویشن کا ریجنل لیڈر بنانے کے عزم کا اظہار کیا اور ورلڈ لبرٹی فنانشل وفد کو حکومت پنجاب کی ڈیجیٹل ٹیکنالوجیکل ایڈوانس منٹ اور مالیاتی اشتراک کار کے بارے میں آگاہ کیا۔
اس موقع پر وزیراعلیٰ مریم نواز شریف نے کہا ہے کہ پنجاب ڈیجیٹل ٹیکنالوجی اور آن لائن ٹریڈ میں تیزی سے آگے بڑھ رہا ہے۔
