اسلام آباد: (دنیا نیوز) پاک بھارت جنگ، عالمی برادری نے پاکستان پر بھارتی جارحیت پر اظہارِ تشویش کیا۔
عالمی برادری نے بھارت کی پاکستان میں جاری اشتعال انگیزیوں پر شدید تحفظات کا اظہار کیا، بین الاقوامی سطح پر پاکستان کے دفاعی اقدامات کو سراہا گیا، بین الاقوامی تجزیہ کاروں نے بھارت کی خطے کو غیر مستحکم کرنے کی کوششوں پر سخت تنقید کی۔
ایسوسی ایٹ پروفیسر یونیورسٹی ایٹ آلبانی کرسٹوفر کلیری نے پاکستان کے ذمہ دار کردار کی حمایت کی اور کہا کہ بھارت کے ممکنہ فضائی نقصانات کو مدنظر رکھتے ہوئے پاکستان کا جوابی اقدام مکمل اور مؤثر ہے۔
سابق امریکی سفارتکار الزبتھ تھریلكیڈ نے پاکستان کے ذمہ دارانہ کردار کو سراہا اور کہا کہ پاکستان نے بھارتی جنگی طیارے مار گرا کر اپنی عسکری صلاحیتوں کو ثابت کیا، عالمی برادری پاکستان کے کشیدگی کم کرنے کے اقدامات کی حوصلہ افزائی کرے۔
چین کے سیاسی تجزیہ کار ژانگ ہی چینگ نے پاکستان کی بھرپور حمایت کی اور کہا کہ پاکستان ہمیشہ سے امن کا خواہاں رہا ہے اور وہ اپنی قومی خودمختاری اور مفادات کا بھرپور دفاع کرے گا، اب وقت آ گیا ہے کہ پاکستان کی قوت کو تسلیم کیا جائے اور بے بنیاد دعوؤں سے گریز کیا جائے۔
سی این این کی جانب سے کہا گیا کہ پاکستان کی مضبوط اور پُرعزم قیادت نے دور اندیش فیصلے کئے ہیں، پاکستان نے بروقت دفاعی اقدامات اٹھا کر دنیا بھر میں اپنی عسکری طاقت کا لوہا منوایا ہے، بھارتی فوج کو پیچھے چھوڑتے ہوئے پاکستانی فوج دنیا کی سب سے طاقتور افواج میں شامل ہو گئی ہے۔
سکھ رہنما ہرجیت سنگھ نے کہا کہ بھارت سے ہوشیار رہیں، یہ سکھوں کے شہر پنجاب پر حملہ آور ہو کر الزام پاکستان پر لگا سکتا ہے۔
دفاعی ماہرین کی جانب سے پاکستان کے دفاعی اقدامات کو ذمہ دارانہ اور مؤثر قرار دیا گیا، انہوں نے کہا کہ پاکستان کا بھارتی طیارے مار گرانا اس کی عسکری برتری کا ثبوت سمجھا جا رہا ہے۔
دفاعی ماہرین کے مطابق عالمی برادری نے پاکستان کو امن کے لیے سنجیدہ فریق تسلیم کرنے کی بھی تجویز دی، بھارت کی فضائی ناکامیوں نے اس کی فوجی صلاحیتوں پر سوالات اٹھا دیئے۔
