اسلام آباد:(دنیانیوز) مشیر وزیراعظم برائے سیاسی امور راناثنااللہ نے کہا ہے کہ ہر چیز لوگوں کے سامنے ہے دفاعی حکمت عملی سے بھارتی جارحیت کا جواب دیا۔
وفاقی دارالحکومت میں میڈیا سے گفتگو کرتے ہوئے راناثنااللہ نے کہا ہے کہ بھارت ابہام پیدا کرتا ہے، پاکستان نے میزائل اٹیک کیا، پاکستان کو انٹرنیشنل قوانین کے مطابق دفاع کا پورا حق حاصل ہے۔
انہوں نے کہا کہ 6اور7مئی کو بھارت نےجارحیت کا مظاہرہ کیا، پاکستان نے دفاعی حکمت عملی سے بھارتی جارحیت کا جواب دیا، ہم نے بھارتی ڈرونز کو بھی مار گرایا، جہاں سے بھارت اٹیک کررہا تھا ہم نے ان کو نشانہ بنایا۔
مشیر وزیراعظم برائے سیاسی امور کا کہنا تھا کہ ہمارے بھرپور جواب سے بھارت کی مرمت ہوگئی ہے،بھارت کو دنیا میں ہزیمت اٹھانا پڑی، ہم نے سفارتی محاذ پر زبردست قوم ہونے کا ثبوت دیا، تمام سیاسی ومذہبی جماعتوں نے قومی یکجہتی کا مظاہرہ کیا، پوری دنیا میں پاکستان میڈیا کی عزت بڑھی ہے، بھارتی میڈیا کی پوری دنیا کے سامنے بدنامی ہوئی۔
راناثنااللہ کا مزید کہنا تھا کہ اس وقت پوری دنیا ہمارے ساتھ کھڑی ہے، دنیا جانتی ہے بھارت نے جارحیت کا مظاہرہ کیا اور ہم نے اپنا دفاع، ہم پہلگام واقعہ کے وقت سے ہی آزادانہ تحقیقات کا مطالبہ کررہے ہیں،ہمارے دوست ممالک کا دنیا میں ایک اہم کردار ہے۔
