اسلام آباد: (دنیا نیوز) صدر مملکت آصف علی زرداری نے کہا کہ پاک افواج نے بھارت کی نام نہاد فوجی قوت کو سخت ٹھیس پہنچائی۔
پاک بھارت کشیدگی اور جنگ بندی پر اپنے بیان میں صدر مملکت آصف علی زرداری نے کہا کہ مجھے پاکستان کی مسلح افواج، پاک بحریہ اور فضائیہ پر ہمیشہ سے یقین رہا ہے، ہم نے بھارتی جارحیت کا منہ توڑ جواب دیا۔
صدر مملکت نے کہا کہ آج ہماری قوم کا عزم بےمثال ہے، یہی عزم ہمارے آباؤ اجداد کے دو قومی نظریہ کو تقویت بخشتا ہے، بحیثیت اسلامی ریاست اور اللہ پر ہمارے ایمان نے ہمیں اپنے حجم سے پانچ گنا زیادہ ملک کے خلاف کھڑے ہونے کی طاقت اور ہمت عطا کی۔
آصف علی زرداری نے کہا کہ میں آرمی چیف جنرل سید عاصم منیر، ایئر چیف مارشل ظہیر احمد بابر سدھو اور نیول چیف ایڈمرل نوید اشرف اور تمام افواج کو مبارکباد پیش کرتا ہوں جن کی بہادری اور انتھک محنت نے اس جنگ میں ہمیں فتح سے ہمکنار کیا۔
صدر مملکت نے کہا کہ قوم کو خوشی منانی چاہیے اور بھارتی جارحیت میں شہید ہونے والوں کے لیے دعا بھی کرنی چاہیے۔
انہوں نے کہا کہ جنوبی ایشیا میں پائیدار امن کا قیام تنازع جموں و کشمیر کے اقوامِ متحدہ کی سلامتی کونسل کی قراردادوں کے مطابق حل اور دیگر مرکزی مسائل بالخصوص سندھ طاس معاہدہ کے حل میں ہے۔
آصف علی زرداری نے کہا کہ میں ان تمام دوست ممالک بشمول چین، امریکا، ترکیہ، سعودی عرب اور ایران کا شکریہ ادا کرتا ہوں جو اس مُشکل گھڑی میں ہمارے ساتھ کھڑے ہوئے۔
صدر مملکت کا کہنا تھا کہ پاکستان اشتعال انگیزی نہیں چاہتا، امن کا خواہاں ہے لیکن ہم اپنی خودمختاری پر کبھی سمجھوتہ نہیں کریں گے۔
