کراچی: (دنیا نیوز) شہرقائد کے مختلف علاقوں میں آج صبح ایک بار پھر زلزلے کے جھٹکے محسوس کیے گئے جس کی وجہ سے شہریوں میں خوف و ہراس پھیل گیا۔
ذرائع کے مطابق آج ہفتے کی صبح لانڈھی، شاہ فیصل کے علاقے ملت ٹاؤن اور ماروی گوٹھ قائد آباد و اطراف کے علاقوں میں زلزلے کے جھٹکے محسوس کیے گئے ہیں۔
زلزلے کے جھٹکے محسوس ہونے پر شہری خوفزدہ ہو کر گھروں سے باہر نکل آئے، زلزلہ صبح 9 بج کر 53 منٹ پر محسوس کیا گیا جس کی گہرائی 35 کلومیٹر اور شدت 3.2 محسوس کی گئی۔
واضح رہے کہ کراچی میں یکم جون کو زلزلوں کا سلسلہ شروع ہوا تھا اور اب تک مختلف علاقوں میں مجموعی طور پر 39 زلزلوں کے جھٹکے محسوس کیے جا چکے ہیں۔
قبل ازیں جمعرات کے روز (12 جون کو) بھی قائد آباد سمیت ملیر اور گرد و نواح میں رات گئے زلزلے کے جھٹکے محسوس کیے گئے تھے جس کی شدت ریکٹر سکیل پر 2.6 ریکارڈ کی گئی اور اس کی گہرائی 10 کلومیٹر تھی۔
واضح رہے کہ محکمہ موسمیات کے نیشنل سونامی سینٹر کے ڈائریکٹرامیر حیدر لغاری نے لانڈھی فالٹ لائن کے آئندہ چندروزتک فعال رہنے کی پیش گوئی کی تھی اور بتایا تھا کہ زیر زمین موجود تہوں کی نقل وحرکت کی وجہ سے توانائی پیدا ہو رہی ہے جو بتدریج خارج ہونے کی وجہ سے زلزلوں کا سبب بن رہی ہے۔
