لاہور: (دنیا نیوز) سابق وزیراعلیٰ پنجاب چودھری پرویز الہٰی نے کہا ہے کہ پہلے مزاحمت پھر مفاہمت ہوتی ہے، مذاکرات سے کوئی نہ کوئی بہتر صورتحال نکل آتی ہے۔
احتساب عدالت راولپنڈی میں پیشی کے موقع پر میڈیا سے گفتگو کرتے ہوئے چودھری پرویز الہٰی کا کہنا تھا کہ ہمیشہ بہتری کی امید رکھنی چاہیے اور ملکی حالات بہتر ہوں گے۔
صحافی نے سابق وزیراعلیٰ سے سوال پوچھا کہ صدر کو تبدیل کئے جانے یا ہٹائے جانے سے متعلق بات چیت ہو رہی ہے، 27 ویں آئینی ترمیم لائی جا رہی ہے کیا کہیں گے؟ جس پر پرویز الہٰی نے جواب دیا کہ ’اچھا او ہو‘ یہ تو میں آپ سے سن رہا ہوں۔
صحافی نے دوسرا سوال کیا کہ بانی پی ٹی آئی عمران خان کی رہائی کیلئے 5 اگست کو احتجاج کی کال دی گئی ہے اور دوسری طرف مذاکرات کی بات ہو رہی ہے، کونسا راستہ درست ہے؟ جس پر سابق وزیراعلیٰ نے کہا کہ پہلے مزاحمت ہوتی ہے پھر مفاہمت ہوتی ہے تو مفاہمت ہی بہتر ہے، مذاکرات کی کوئی نہ کوئی صورتحال بہتر نکل آتی ہے۔
تخت پڑی جنگلات اراضی ریفرنس: پرویز الہٰی کے وارنٹ گرفتاری منسوخ
دوسری جانب راولپنڈی کی احتساب عدالت نے خرد برد ریفرنس میں پیش ہونے پر چودھری پرویز الہٰی کے وارنٹ گرفتاری منسوخ کر دیئے۔
احتساب عدالت کے جج شیخ اعجاز علی نے تخت پڑی جنگلات کی 6 ہزار کنال اراضی میں خرد برد ریفرنس کی سماعت کی، دوران سماعت چودھری پرویز الہیٰ کے وکلاء نے اراضی ریفرنس کی قانونی حیثیت کو چیلنج کیا۔
وکلاء نے کہا کہ نیب ریفرنس کس آرڈر کے تحت بنایا گیا، چیئرمین نیب کے دستخط ہی موجود نہیں، ریفرنس پر تاریخ کا اندراج بھی نہیں، نہ ریفرنس بنتا ہے اور نہ ہی قابل سماعت ہے، جس پر پراسیکیوٹر سردار مظفر عباسی نے کہا کہ ریفرنس پر چیئرمین نیب کے دستخط موجود ہیں۔
وکیل صفائی قاضی مصباح نے کہا کہ دستخط موجود ہیں تو ہمیں دکھائیں، نہ دستخط ہیں نہ تاریخ ہے۔
پرویزالہیٰ کے وکلاء کی جانب سے حاضری سے استثنیٰ کی درخواست پر دلائل دیئے گئے جبکہ نیب پراسیکیوٹر سردار مظفر کی جانب سے حاضری سے استثنیٰ کی مخالفت کی گئی۔
احتساب عدالت نے چودھری پرویز الہٰی کو اگلی سماعت پر پیش ہونے کی ہدایت کرتے ہوئے ریفرنس کی سماعت 17 جولائی تک ملتوی کر دی۔
