مظفرآباد: (دنیا نیوز) وزیراعظم آزاد جموں و کشمیر چودھری انوارالحق نے کہا کہ یوم شہدا کشمیر تحریک آزادی میں ایک سنگ میل کی حیثیت رکھتا ہے، سرینگر اور جموں پر سبز ہلالی پرچم لہرائے گا۔
وزیراعظم آزادکشمیر کا کہنا ہے کہ کچھ واقعات قوموں کی زندگی میں بڑی اہمیت کے حامل ہوتے ہیں، یہ دن تحریک آزادی کشمیر میں ایک خاص اہمیت کا حامل ہے ، 13 جولائی 1931 کو کشمیری عوام نے شخصی حکمرانی کو للکارا اور مہاراجہ کے ظالمانہ اقدامات کے خلاف صدائے احتجاج بلند کیا۔
چودھری انوارالحق نے بتایا کہ 13 جولائی 1931 کو کشمیری مسلمانوں نے مہاراجہ کے خلاف ایک اجتماع منعقد کیا، 13 جولائی 1931 کو 22 کشمیری مسلمانوں نے ایک ایک کر کے شہادت کا جام نوش کیا اور آذان کو مکمل کیا، کشمیری ڈوگرہ فوج کی دہشت گردی کے خلاف مسلسل مذاحمت کرتے رہے۔
انہوں نے مزید بتایا کہ شہدا میں سے کسی ایک کی بھی پیٹھ پر گولی نہیں لگی بلکہ سب نے سینے پر گولیاں کھائیں، آزادی کے لیے اس شجاعت اور جذبے کی دنیا کی کسی تاریخ میں مثال نہیں ملتی، کشمیری شہدا کی قربانیاں رنگ لائیں گی اور مقبوضہ کشمیر بھارتی ظلم و استبداد سے آزاد ہو گا۔
وزیراعظم آزادکشمیر نے کہا کہ کشمیریوں نے پاکستان کی محبت میں جو قربانیاں دی ہیں وہ رنگ لائیں گی اور سرینگر اور جموں میں سبز ہلالی پرچم لہرائے گا، پوری ریاست جموں و کشمیر کا الحاق پاکستان سے ہو گا۔
انہوں نے اس عزم کا اظہار کیا کہ حکومت اس مشن کو مکمل کرنے کے لیے اپنی بھرپور صلاحیتیں بروئے کار لائے گی۔
