اسلام آباد: (دنیا نیوز) وزیراعظم شہباز شریف نے کہا ہے کہ دانش سکولز اور دانش یونیورسٹی کی تعمیر میں ڈیجیٹل اور جدید کلاس رومز پر زیادہ سرمایہ کاری کی جائے، بطور خادم پاکستان قوم کے بچوں کو بین الاقوامی معیار کی تعلیم و تربیت اپنی اولین ذمہ داری سمجھتا ہوں۔
وزیراعظم شہباز شریف کی زیر صدارت ملک بھر میں دانش سکولز اور اسلام آباد میں دانش سکولز یونیورسٹی کی تعمیر کے حوالے سے پیشرفت پر جائزہ اجلاس منعقد ہوا جس میں وفاقی وزراء احسن اقبال، اعظم نذیر تارڑ، احد خان چیمہ، خالد مقبول صدیقی، چیئرمین وزیراعظم یوتھ پروگرام رانا مشہود احمد، چیف کوارڈینیٹر مشرف زیدی اور متعلقہ اعلیٰ حکام نے شرکت کی۔
اجلاس میں چاروں صوبوں بشمول گلگت بلتستان اور آزاد کشمیر کے چیف سیکرٹریز و نمائندوں نے ویڈیو لنک کے ذریعے اجلاس میں شرکت کی۔
اجلاس کو بتایا گیا کہ کُری اسلام آباد میں دانش سکول کی تعمیر پر کام تیزی سے جاری ہے جس کو راوں برس کے اختتام تک مکمل کر لیا جائے گا، گلگت بلتستان میں سلطان آباد، گھانچے اور استور میں دانش سکولز کی تعمیر پر بھی کام تیزی سے جاری ہے جن پر کام آئندہ برس مکمل ہوگا۔
آزاد کشمیر میں باغ اور بھمبر میں دانش سکولز پر کام شروع ہوچکا جبکہ شاردہ، نیلم میں دانش سکول کا پی-سی ون منظور ہوچکا اور تعمیری کام جلد شروع کر دیا جائے گا۔
اجلاس کو بتایا گیا کہ بلوچستان میں سبی، موسیٰ خیل، ژوب، قلعہ سیف اللہ اور ڈیرہ بگٹی میں دانش سکولز کا پی-سی ون منظور ہو چکا جبکہ حب میں دانش سکولز کی تعمیر کی فیزیبلٹی پر کام جاری ہے، چترال، کراچی اور ٹنڈو محمد خان میں دانش سکولز کی تعمیر کیلئے زمین کا انتخاب ہوچکا ہے جبکہ ان کی فیزیبلٹی اور دیگر اقدمات پر کام تیزی سے جاری ہے۔
دوران بریفنگ اجلاس کو ایبٹ آباد اور وزیرِستان میں دانش سکولز کی تعمیر کی تجاویز اور راجن پور میں یونیورسٹی کے حوالے سے پیش رفت پر بھی آگاہ کیا گیا۔
دانش سکولز یونیورسٹی پر پیش رفت سے آگاہ کرتے ہوئے اجلاس کو بتایا گیا کہ یونیورسٹی کی ٹیکنو فیزیبلٹی پر کام تیزی سے جاری ہے جسے جولائی کے اختتام تک مکمل کر لیا جائے گا جبکہ ماسٹرپلان، ڈیزائن اور تعمیر کیلئے 12 بین الاقوامی فرمز میں سے 7 درکار معیار پر پوری اتری ہیں اور پرکیورمنٹ کمیٹی اس کو حتمی شکل دے رہی ہے۔
عالمی معیار کے ڈگری پروگرامز، داخلوں کی تفصیلات اور الائیڈ سہولیات کو حتمی شکل دی جا رہی ہے۔
اجلاس کے دوران وزیراعظم شہباز شریف نے ہدایت کی کہ دانش سکولز یونیورسٹی میں عمارتوں کو سادہ جبکہ کلاس رومز میں جدید سافٹ ویئر، ڈیجیٹل ایکویپمنٹ، جدید لیبز اور عصر حاضر کی ٹیکنالوجی پر سرمایہ کاری کو مرکزی اہمیت دی جائے۔
انہوں نے کہا کہ دانش سکولز اور دانش یونیورسٹی کی تعمیر میں ڈیجیٹل اور جدید کلاس رومز پر زیادہ سرمایہ کاری کی جائے، بطور خادم پاکستان قوم کے بچوں کو بین الاقوامی معیار کی تعلیم و تربیت اپنی اولین ذمہ داری سمجھتا ہوں۔
وزیراعظم کا کہنا تھا کہ دانش سکولز میں اساتذہ کو بہترین پیکیج فراہم کیا جائے، اساتذہ اور سٹاف کی بھرتیوں میں شفافیت اور میرٹ کو مرکزی اہمیت دی جائے، آزاد کشمیر اور گلگت بلتستان میں دانش سکولز کی تعمیر پر کام کو تیز کیا جائے۔
انہوں نے کہا کہ دانش سکولز، یونیورسٹی میں عالمی معیار کے جدید علوم کی تعلیم پر توجہ مرکوز کی جائے۔
شہباز شریف کا کہنا تھا کہ اللہ کے فضل و کرم سے پنجاب میں دانش سکولز کی صورت میں جو پودا لگایا تھا وہ تناور درخت بن چکا، غریب و متوسط طبقے کے سیکڑوں طلباء دانش سکولز سے فارغ التحصیل ہوکر دنیا بھر میں اپنی صلاحیتوں کو لوہا منوا رہے ہیں۔
وزیرِ اعظم نے کہا کہ دانش سکولز سے معاشی طور پر کمزور طبقے کے بچوں کی خدمت کا جو خواب دیکھا، اللہ کے بے پایاں فضل سے وہ شرمندہ تعبیر ہو رہا ہے، پورے ملک میں دانش سکولز کے قیام سے ہزاروں بچے مستفید ہوں گے۔
شہباز شریف نے مزید کہا کہ ہر طبقے کو اعلیٰ تعلیم و تربیت کے یکساں مواقع کی فراہمی کیلئے ہمیشہ کوشاں رہوں گا۔
