اسلام آباد: (دنیا نیوز) وزیراعظم شہباز شریف نے کہا ہے کہ پی آئی اے کی برطانوی فضائی حدود میں واپسی پاکستان کی کامیابی ہے۔
سماجی رابطے کی ویب سائٹ ایکس پر پیغام میں وزیراعظم شہباز شریف نے لکھا کہ الحمدللہ! پی آئی اے کی برطانیہ کے آسمانوں پر واپسی ہو چکی ہے، آج کا اعلان طویل انتظار کے بعد خاندانوں اور دوستوں کیلئے دوبارہ ملنے کے نئے مواقع لے کر آیا ہے۔
انہوں نے کہا کہ پی ٹی آئی ارکان کی جانب سے دیئے گئے غیر ذمہ دارانہ بیانات نے پاکستان کی ساکھ کو ناقابل تلافی نقصان پہنچایا، جس سے ہمارے قومی کیریئر کو برسوں برطانیہ اور یورپ سمیت اہم عالمی راستوں سے محروم رکھا گیا۔
— Shehbaz Sharif (@CMShehbaz) July 16, 2025
ان کا کہنا تھا کہ برطانیہ اور پاکستان کے درمیان سفر میں یہ آسانی اس اہم تجارتی تعلقات کو کئی گنا بڑھنے میں مدد دے گی۔
وزیراعظم نے نائب وزیراعظم، وزیر دفاع، پوری ایوی ایشن ٹیم اور دیگر تمام سٹیک ہولڈرز کی اس سلسلے میں انتھک کوششوں کو سراہا۔
یاد رہے کہ برطانیہ نے پاکستانی ایئر لائنز پر طویل عرصے سے عائد پابندیاں ختم کر دیں ہیں، برطانوی ہائی کمیشن کا کہنا ہے کہ پاکستان کا نام برطانیہ کی ایئر سیفٹی لسٹ سے نکال دیا گیا، پاکستانی ایئر لائنز اب برطانیہ کیلئے پروازوں کی اجازت کی درخواست دے سکتی ہیں۔
برطانوی ایئر سیفٹی کمیٹی کی جانب سے پاکستان کی جانب سے فضائی حفاظت کے نظام میں بہتری کو تسلیم کرتے ہوئے یہ فیصلہ کیا گیا۔
