کراچی: (دنیا نیوز) وزیراعلیٰ سندھ مراد علی شاہ نے بارشوں سے تکلیف پر حیدر آباد کے شہریوں سے معذرت کرلی۔
وزیراعلیٰ سندھ مراد علی شاہ نے کہا کہ حیدر آباد میں پانی پمپوں کے ذریعے نکالا گیا، زیادہ تر علاقے کلیئر ہیں، کچھ میں اب بھی بارش کا پانی جمع ہے، نیویارک میں بھی بارش کے بعد حالات دیکھے ہوں گے، پنجاب میں بھی شدید بارشیں آئی ہیں۔
مراد علی شاہ کا کہنا تھاکہ حیدر آباد میں شہریوں کو بارش کے بعد زیادہ پریشانی ہوتی ہے، حیسکو سے بجلی کی سپلائی جلد بحال کرنے کی بات کی ہے، بارش کے بعد کی صورتحال سے موثر انداز سے نمٹ رہے ہیں۔
واضح رہے کہ گزشتہ دن شہر میں تیز ہواؤں کے ساتھ موسلا دھار بارش ہوئی، بیشتر علاقے میں پانی جمع ہو گیا تھا، قاسم آباد، سحرش نگر، سومرا گوٹھ و دیگر علاقوں میں پانی بھر گیا تھا، تیز ہواؤں کے باعث بجلی کے ٹاور بھی گر گئے، حیسکو کے 350 فیڈرز بند ہونے سے شہر تاریکی میں ڈوب گیا تھا۔
متعدد علاقوں میں بجلی کی فراہمی معطل ہوگئی تھی، شہری شدید اذیت سے دوچار ہوگئے، وزیراعلیٰ مراد علی شاہ نے میئر حیدرآباد سے رابطہ کرکے فوری طور پر نکاسی کے اقدامات کی ہدایت کی تھی۔
موسلا دھار بارش کے باعث دکان کی چھت کا ایک حصہ گرنے سے ملبے تلے دب کر ایک شخص زندگی کی بازی ہار گیا تھا جبکہ 3 افراد زخمی ہو ہوئے تھے۔
