لاہور: (دنیا نیوز) وزیراعلیٰ پنجاب مریم نواز نے کہا ہے کہ وطن عزیز کی ترقی میں اوورسیز پاکستانیوں کا کردار ناقابل فراموش ہے۔
مریم نواز سے رکن قومی اسمبلی نصیر احمد عباس نے ملاقات کی، ملاقات میں باہمی دلچسپی کے امور اور ترقیاتی منصوبوں میں پیشرفت پرتبادلہ خیال کیا گیا۔ اس موقع پر اوورسیز پاکستانیوں کے مسائل کے حل سے متعلق امور پر بھی گفتگو کی گئی، ملاقات میں ن لیگ جاپان کے صدر ملک نور اعوان بھی شریک تھے۔
اس موقع پر وزیر اعلیٰ نے کہا ہے کہ مسلم لیگ ن عوامی خدمت کی سیاست پر یقین رکھتی ہے، ہر علاقے کی ترقی اور عوامی فلاح کیلئے تمام وسائل بروئے کار لائے جا رہے ہیں، مثالی گاؤں پراجیکٹ کے تحت دیہات میں معیاری سہولتیں فراہم کر رہے ہیں۔
انہوں نے کہا کہ پنجاب کی 12 ہزار کلومیٹر سڑکوں کی تعمیر و بحالی ہو چکی ہے، فیلڈ ہسپتال اور کلینک آن وہیلز سے ایک کروڑ سے زائد مریض مستفید ہو چکے ہیں، حکومت اوورسیز پاکستانیوں کے مسائل کے حل کیلئے اقدامات کر رہی ہے۔
