راولپنڈی: (دنیا نیوز) پاکستان تحریک انصاف کے بانی عمران خان کے اپنے بچوں کو پاکستان آنے سے روکنے کے بیان کے بعد پی ٹی آئی کے سیکریٹری اطلاعات نے نیا دعویٰ کردیا۔
پاکستان تحریک انصاف کے سیکرٹری اطلاعات شیخ وقاص اکرم نے بانی عمران خان کی جانب سے اپنے دونوں بیٹوں کو پاکستان آنے سے روکنے اور اپنی رہائی کیلئے کسی سرگرمی میں حصہ لینے سے روکنے کی خبروں کی تردید کردی۔
ایکس پر جاری اپنے بیان میں شیخ وقاص اکرم نے کہا کہ ’عمران خان صاحب کے بچے پاکستان آئیں گے کسی کو بھی اس میں کوئی شک نہیں ہونا چاہیے‘۔
— Sheikh Waqas Akram (@SheikhWaqqas) July 29, 2025
انہوں نے کہا کہ ابھی اس حوالے سے فقط تاریخ کا تعین ہونا باقی ہے اور ساتھ میں سب کو یاد رہے کہ جب انہوں نے آنے کا فیصلہ کیا تھا تو والد سے واضح کہا تھا کہ ہم اپ سے اجازت نہیں لے رہے بلکہ اپ کو اطلاع دے رہے ہیں‘۔
شیخ وقاص اکرم نے کہا کہ جو لوگ قاسم اور سلیمان کے پاکستان نہ آنے کا پروپیگنڈا کررہے ہیں اُس سے پرہیز کی جائے کیونکہ اس کا کوئی فائدہ نہیں ہے اور وہ دونوں پاکستان آرہے ہیں۔
— Sheikh Waqas Akram (@SheikhWaqqas) July 29, 2025
قبل ازیں آج اڈیالہ جیل میں مقدمے کی سماعت کے دوران جب عمران خان سے پوچھا گیا کہ آیا ان کے بیٹے 5 اگست کو ہونے والے احتجاج میں شرکت کے لیے آئیں گے، تو انہوں نے دو ٹوک جواب دیا: نہیں، وہ احتجاج کے لیے پاکستان نہیں آئیں گے ۔
اس سے قبل پی ٹی آئی کی مقامی قیادت اور عمران خان کی بہن علیمہ خان نے دعویٰ کیا تھا کہ قاسم اور سلیمان والد کی حمایت میں پاکستان آئیں گے، مگر اب عمران خان نے ان خبروں کی تردید کر دی ہے۔
تاہم ذرائع کا کہنا ہے کہ اگر ان کے بیٹے صرف ملاقات کی غرض سے آئیں، تو یہ ایک الگ معاملہ ہوگا اور عدالت اس ملاقات کی اجازت دے سکتی ہے۔
