اسلام آباد: (دنیا نیوز) چیئرمین سینیٹ سید یوسف رضا گیلانی نے کہا کہ 14 اگست کا دن عظیم جدوجہد اور بے مثال قربانیوں کا آئینہ دار ہے جو برصغیر کے مسلمانوں نے پاکستان کے قیام کے لئے دیں۔
چیئرمین سینیٹ یوسف رضا گیلانی نے قوم کو یومِ آزادی کی مبارکباد دیتے ہوئے اپنے خصوصی پیغام میں کہا کہ ہمارے بزرگوں اور قائدین نے گھربار، جائیدادیں اور جانیں قربان کر کے ایک آزاد اور خودمختار مملکت کا قیام ممکن بنایا جہاں ہم اپنے دین، ثقافت اور روایات کے مطابق زندگی گزار سکیں۔
یوسف رضا گیلانی نے کہاکہ یہ قربانیاں آنے والی نسلوں کے لئے ہمیشہ مشعل راہ رہیں گی اور اس بات کا ثبوت ہیں کہ ایک پرعزم اور متحد قوم ہر منزل حاصل کر سکتی ہے۔
چیئرمین سینیٹ کا کہنا تھا کہ پاکستان کا قیام علامہ محمد اقبالؒ کے خواب کی تعبیر اور قائداعظم محمد علی جناحؒ کی جرأتمند قیادت کا ثمر تھا، 14 اگست 1947ء کو پاکستان دنیا کے نقشے پر ایک آزاد اور خودمختار ملک کی حیثیت سے ابھرا۔
انہوں نے مزید کہا کہ آزادی ایک بے بہا نعمت ہے اور اس کی حفاظت، بقاء اور استحکام ہر پاکستانی کا مشترکہ فرض ہے، انہوں نے تمام پارلیمنٹیرینز پر زور دیا کہ وہ سیاسی وابستگیوں سے بالاتر ہو کر ملک کی ترقی، خوشحالی اور استحکام کے لئے خلوصِ نیت سے اپنا کردار ادا کریں۔
.jpg)
