بلاول کی سفارتی میدان میں مودی سرکار کو شکست قابل تحسین ہے: شرجیل میمن

کراچی: (دنیا نیوز) سندھ کے سینئر وزیر شرجیل انعام میمن نے کہا ہے کہ چیئرمین پیپلز پارٹی بلاول بھٹو زرداری نے جس طرح سفارتی میدان میں مودی سرکار کو شکست دی وہ قابل تحسین ہے۔

چیئرمین بلاول بھٹو زرداری کو نشانِ امتیاز ملنے پر دلی مبارکباد دیتے ہوئے سندھ کے سینئر وزیر شرجیل انعام میمن نے کہا کہ نشانِ امتیاز، بلاول بھٹو زرداری کی پاکستان کے لیے کی گئی بے مثال خدمات کا تسلیم شدہ اعزاز ہے۔

انہوں نے کہا کہ یہ اعزاز ہر اس پاکستانی کے لیے باعثِ فخر ہے جو ملک کی عزت و وقار کو دنیا میں بلند دیکھنا چاہتا ہے، بلاول بھٹو نے دنیا بھر میں جس طرح مودی سرکار کی علاقائی غنڈہ گردی کو بے نقاب کیا وہ قابلِ تحسین اور ہر پاکستانی کے لیے باعثِ فخر ہے۔

شرجیل انعام میمن کا کہنا تھا کہ چیئرمین بلاول بھٹو کی واضح اور بھرپور سفارتکاری نے دنیا کو بتایا کہ پاکستان امن چاہتا ہے مگر اپنے قومی مفادات اور وقار پر کوئی سمجھوتہ نہیں کرے گا۔

انہوں نے کہا کہ بلاول بھٹو زرداری کی یہ کامیابی نہ صرف ان کی ذاتی خدمات کا اعتراف ہے بلکہ پاکستان کی سفارتی تاریخ میں ایک سنہری باب کا اضافہ ہے۔

سینئر صوبائی وزیر نے کہا کہ بلاول بھٹو زرداری نے پاکستان کے مؤقف کو عالمی فورمز پر جس جرأت مندی، مدلل انداز اور بردباری سے پیش کیا، وہ قابلِ فخر ہے۔

شرجیل میمن نے کہا کہ بلاول بھٹو زرداری نے بھارت کا مکروہ چہرہ بے نقاب کیا اور دنیا کو ایک پرامن، ترقی پسند اور مثبت پاکستان سے روشناس کروایا۔

انہوں نے کہا کہ بلاول بھٹو زرداری کی قیادت میں بین الاقوامی سطح پر پاکستان کا موقف نہ صرف سنا گیا بلکہ اسے مثبت انداز میں سراہا بھی گیا۔

سینئر صوبائی وزیر نے کہا کہ اپنی نوجوان قیادت اور جدید سفارتی وژن کے ذریعے پاکستان کے امیج کو بہتر بنانے میں چیئرمین بلاول بھٹو نے کلیدی کردار ادا کیا۔