نیویارک: (دنیا نیوز) پاکستان اور مغربی بحرالکاہل میں واقع جزیرہ نما ملک مائکرونیشیا نے باضابطہ طور پر سفارتی تعلقات قائم کر لیے۔
پاکستان کے مستقل مندوب برائے اقوام متحدہ سفیر عاصم افتخار احمد اور وفاقی ریاست مائکرونیشیا کے مستقل مندوب سفیر جیم ایس لپوے نے نیویارک میں مشترکہ اعلامیہ پر دستخط کیے جس کے ذریعے دونوں ممالک کے تعلقات کو باضابطہ شکل دی گئی۔
یہ دستخطی تقریب پاکستان مشن برائے اقوام متحدہ میں منعقد ہوئی جس میں دونوں ممالک کے سفارتکاروں نے شرکت کی جن میں پاکستان کے نائب مستقل مندوب سفیر عثمان جدون بھی شامل تھے۔
اس موقع پر خطاب کرتے ہوئے سفیر عاصم افتخار احمد نے کہا ہے کہ انہیں اس بات کی بے حد خوشی ہے کہ دونوں ممالک کے درمیان سفارتی تعلقات پاکستان کے یوم آزادی کی سالگرہ کے موقع پر قائم ہو رہے ہیں۔
انہوں نے کہا کہ یہ تعلقات انسانی وسائل کے انتظام، استعداد کار میں اضافہ اور ماحولیاتی تبدیلی جیسے شعبوں میں تعاون کے نئے راستے کھولیں گے، دونوں ممالک کے مشن اقوام متحدہ میں عالمی امن و سلامتی کے فروغ سمیت اہم معاملات پر قریبی تعاون کریں گے۔
عاصم افتخار نے خوشی کا اظہار کیا کہ پاکستان وہ 100 واں ملک ہے جس کے ساتھ وفاقی ریاست مائکرونیشیا نے اپنے تعلقات قائم کیے ہیں۔
دوسری جانب سفیر جیم ایس لپوے نے دو طرفہ تعلقات کے ایک نئے باب کے آغاز پر مسرت کا اظہار کیا، انہوں نے کہا کہ یہ ان کے لیے اعزاز کی بات ہے کہ وہ اپنے ملک کی نمائندگی کرتے ہوئے پاکستان کے ساتھ دوستی اور شراکت داری کے اس سفر کا باضابطہ آغاز کر رہے ہیں۔
انہوں نے اپنے ملک میں اقوام متحدہ کے دفاتر کھولنے کے لیے پاکستان کی جانب سے فراہم کی گئی حمایت پر شکریہ ادا کیا اور کہا کہ وہ اپنے پاکستانی ہم منصب کے ساتھ مل کر دوستی کے رشتے کو مزید مضبوط بنانے کے خواہاں ہیں۔
جیم ایس لپوے نے پاکستان کے یوم آزادی کے موقع پر مبارکباد بھی پیش کی۔
تقریب سے قبل دونوں سفراء کے درمیان ایک مختصر ملاقات بھی ہوئی جس میں دو طرفہ اور اقوام متحدہ کے فورم پر ممکنہ تعاون سمیت باہمی دلچسپی کے امور پر تبادلہ خیال کیا گیا۔
.jpg)
