راولپنڈی: (دنیا نیوز) پاک فضائیہ کا گلگت بلتستان میں سیلاب زدہ علاقوں میں بڑے پیمانے پر ریلیف آپریشن مکمل ہوگیا۔
پاک فوج کے شعبہ تعلقات عامہ (آئی ایس پی آر) کے مطابق سخت موسمی حالات اور دشوار گزار پہاڑی سلسلوں کے باوجود پاک فضائیہ کے سی-130 طیارے نے پی اے ایف بیس نور خان سے 7 ٹن خشک راشن، روزمرہ استعمال کی اشیاء اور جان بچانے والی ادویات گلگت پہنچائیں۔
یہ سامان نیشنل ڈیزاسٹر مینجمنٹ اتھارٹی کے تعاون سے دور دراز متاثرہ وادیوں میں تقسیم کیا جائے گا، جہاں رابطہ سڑکیں ٹوٹنے کے باعث مقامی آبادی امداد سے محروم تھی۔
ترجمان پاک فوج کے مطابق اسی دوران پاک فضائیہ کی ریلیف ٹیم نے متاثرہ علاقوں سے 75 پھنسے ہوئے افراد کو بھی بحفاظت نکال کر محفوظ مقامات پر منتقل کیا، یہ مربوط اور بروقت کارروائی ملک گیر ایمرجنسی ریلیف مہم کا حصہ ہے، جو قدرتی آفات کے دوران انسانی جانوں کے تحفظ کیلئے پاک فوج کے عزم کی عکاس ہے۔
آئی ایس پی آر کا کہنا ہے کہ آنے والے دنوں میں بھی پاک فضائیہ کے طیارے اور زمینی ٹیمیں مسلسل امدادی کارروائیوں میں مصروف رہیں گی اور متاثرہ خاندانوں کو خوراک، ادویات، رہائش اور طبی امداد فراہم کی جائے گی۔
ترجمان پاک فوج نے بتایا کہ پاک فضائیہ کے بروقت اور جرات مندانہ ردعمل نے گلگت بلتستان کے متاثرہ خاندانوں کو نئی امید دلائی ہے اور یہ اس بات کا ثبوت ہے کہ مسلح افواج ہر مشکل گھڑی میں قوم کے شانہ بشانہ کھڑی ہیں۔
