اسلام آباد: (دنیا نیوز) جنوبی سندھ بالخصوص کراچی میں حالیہ شدید بارشوں و شہری سیلابی صورتحال پر وزیرِ اعظم نے وزیر اعلیٰ سندھ سے ٹیلیفونک رابطہ کیا۔
شہباز شریف نے سید مراد علی شاہ کو وفاقی حکومت کی جانب سے حکومت سندھ کو اس ہنگامی صورتحال سے نمٹنے کیلئے ہر قسم کی معاونت فراہم کرنے کی پیش کش کی۔
وزیرِ اعظم نے چیئرمین این ڈی ایم اے کو سندھ حکومت سے مسلسل رابطے میں رہنے اور ہنگامی صورتحال کیلئے ان کی ضروریات کے حوالے سے مکمل تعاون کی ہدایت کی۔
شہباز شریف نے چیئرمین این ڈی ایم اے کو آئندہ ایک دو روز میں سندھ کے جنوبی اضلاع میں متوقع بارش کے حوالے سے مکمل تیار رہنے اور لوگوں کو آگاہی فراہم کرنے کی بھی ہدایت کی۔
وزیراعظم نے کہا کہ وفاقی حکومت ہنگامی صورتحال سے نمٹنے کیلئے حکومت سندھ کی ہر قسم کی معاونت کرے گی۔
