اسلام آباد:(دنیا نیوز) اقتصادی رابطہ کمیٹی (ای سی سی) کے اجلاس میں بارشوں سے متاثرہ افراد کیلئے 5.8 ارب روپے کے ریلیف پیکیج کی منظوری دی گئی۔
وفاقی وزیر خزانہ محمد اورنگزیب کی زیر صدارت اقتصادی رابطہ کمیٹی (ای سی سی) اجلاس کا ہوا، جس میں فوری طور پر 4 ارب روپے متاثرین کیلئے جاری کرنے کی ہدایت کی گئی۔
اعلامیہ کے مطابق ای سی سی نے ملک بھر میں فیول چارجز ایڈجسٹمنٹ کے یکساں اطلاق کی منظوری دی ، ایف سی اے کے یکساں اطلاق بارے سمری پاور ڈویژن نے پیش کی جب کہ نیشنل شپنگ کارپوریشن کو 33 کروڑ روپے کی ادائیگی کی منظوری بھی دی گئی۔
اعلامیہ میں یہ بھی بتایا گیا کہ سٹیل ملز کیس کے حتمی فیصلے کیلئے وزارت کو 3 ماہ میں رپورٹ دینے کی ہدایت کی گئی ، اجلاس میں وزیراعظم فین ریپلیسمنٹ پروگرام کیلئے 2 ارب روپے جاری کرنے کی منظوری بھی ہوئی ۔
اسی طرح اسٹریٹجک پالیسی پلاننگ سیل کیلئے 25 کروڑ روپے جاری کرنے، راست کیو آر کوڈ سبسڈی سکیم کیلئے 3.5 ارب روپے اورسکیم تین سال جاری رکھنے کی منظوری بھی دی۔
دوسری جانب اعلامیہ میں یہ بھی کہا گیا کہ ای سی سی نے نئی انرجی وہیکل پالیسی 30-2025کی منظوری بھی دی،اجلاس میں کسانوں کیلئے رسک کوریج سکیم پر بریفنگ دی گئی، سکیم سے 7 لاکھ 50 ہزار نئے کسان قرض نظام میں شامل ہوں گے۔
اعلامیہ میں مزید یہ بھی کہا گیا کہ ای سی سی اجلاس میں گیس سیکٹر سے متعلق امور پر تفصیلی جائزہ لیا گیا جب کہ گیس سیکٹر کے نقصانات کو کنٹرول اور کارکردگی بہتر بنانے کی ہدایت کی گئی۔
