اسلام آباد: (دنیا نیوز) الیکشن کمیشن نے این اے 143 ساہیوال، این اے 185 ڈی جی خان کے ضمنی انتخابات کا شیڈول جاری کر دیا۔
پنجاب کی صوبائی اسمبلی کی نشست پی پی 203 ساہیوال پر بھی ضمنی انتخاب کا شیڈول جاری کیا گیا ہے جس کے مطابق این اے 143،این اے 185 اور پی پی 203 پر ضمنی انتخابات کی پولنگ 5 اکتوبر کو ہوگی۔
شیڈول کے مطابق 26 اگست کو ریٹرننگ آفیسرز پبلک نوٹس جاری کرے گا، 28 سے 30 اگست تک امیدوار کاغذات نامزدگی جمع کرواسکتے ہیں، امیدواروں کی عبوری فہرست 30 اگست کو جاری ہوگی۔
الیکشن کمیشن کے مطابق 3 ستمبر تک امیدواروں کے کاغذات کی جانچ پڑتال ہوگی، 8 ستمبر پر کاغذات کی منظوری یا مسترد ہونے کے خلاف اپیل کی جاسکے گی، 12 ستمبر تک اپیلوں پر فیصلے کیے جائیں گے۔
شیڈول کے مطابق اپیلوں کے فیصلوں کے بعد 13 ستمبر کو امیدواروں کی عبوری فہرست جاری ہوگی، 15 ستمبر کو امیدواروں کاغذات نامزدگی واپس لے سکیں گے۔
الیکشن کمیشن کے مطابق 16 ستمبر کو این اے 143، این اے 185 ، پی پی 203 کے امیدواروں کی حتمی فہرست جاری ہوگی۔
