لاہور: (دنیا نیوز) وفاقی وزیر داخلہ محسن نقوی نے پاکستان ریلویز ہیڈ کوارٹرز کا دورہ کیا اور وزیر ریلویز حنیف عباسی کی صدارت میں ہونے والے خصوصی اجلاس میں شرکت کی۔
اجلاس میں ملک بھر خصوصاً بلوچستان میں ریلویز لائنز اور ٹرینوں کی سکیورٹی کے اقدامات کا تفصیلی جائزہ لیا گیا۔
اجلاس میں فیصلہ کیا گیا کہ ریلویز کی اراضی پر تجاوزات کے خلاف مشترکہ کریک ڈاؤن کیا جائے گا، جس میں نیشنل کونسٹیبلری اور ریلویز پولیس حصہ لیں گی، ایف سی بھی انسداد تجاوزات آپریشن میں ریلویز پولیس کے ساتھ مکمل تعاون کرے گی۔
اسلام آباد اور راولپنڈی کے درمیان ٹرین چلانے کا فیصلہ
وزیر داخلہ محسن نقوی نے کہا کہ اسلام آباد اور راولپنڈی کے درمیان ٹرینیں چلانے کا فیصلہ کیا گیا ہے، ریلویز ٹریکس اور ٹرینوں کی فول پروف سکیورٹی یقینی بنانے کیلئے ہر ممکن اقدامات اٹھائے جائیں گے، انہوں نے مسافروں کی حفاظت کو اولین ترجیح قرار دیا۔
انہوں نے ریلویز کی کارکردگی بہتر بنانے کیلئے حنیف عباسی کے دور میں کیے گئے منفرد اقدامات کو سراہا۔
وزیر ریلویز حنیف عباسی نے تجاوزات کے خاتمے میں فیڈرل ریزرو پولیس کی معاونت پر وزیر داخلہ محسن نقوی کا شکریہ ادا کیا۔
اجلاس میں چیف ایگزیکٹو آفیسر پاکستان ریلویز عامر علی بلوچ، آئی جی ریلویز پولیس رائے طاہر اور دیگر اعلیٰ حکام بھی موجود تھے۔
