اسلام آباد: (دنیا نیوز) صدر مملکت آصف علی زرداری نے انسدادِ دہشت گردی (ترمیمی) بل 2025 کی منظوری دے دی۔
ایوان صدر کے اعلامیے کے مطابق نیا قانون سکیورٹی اداروں کی دہشت گردی روکنے کی صلاحیت مضبوط بنائے گا، قانون میں شفافیت اور احتساب کو یقینی بنایا گیا ہے، بل میں 3 سالہ سن سیٹ کلاز شامل ہے، تاکہ مدت محدود رہے، قانون میں عدالتی نگرانی اور حفاظتی اقدامات شامل کئے گئے ہیں۔
ماہرین کے مطابق یہ قانون پاکستان کو درپیش سکیورٹی چیلنجز سے نمٹنے کے لئے اہم قدم ہے۔
صدر مملکت زرداری کی منظوری کے بعد قانون اب رسمی طور پر نافذ العمل ہو گیا ہے اور متعلقہ ادارے اس پر عملدرآمد شروع کر دیں گے۔
یاد رہے کہ گزشتہ روز صدر آصف علی زرداری نے پٹرولیم ترمیمی بل 2025 کی منظوری دی تھی۔
ترمیمی ایکٹ سمگلنگ اور غیر قانونی پٹرول پمپس کے خلاف اقدامات مضبوط کرتا ہے، جس کی منظوری سے ڈپٹی کمشنرز، اسسٹنٹ کمشنرز اور کسٹمز حکام کو ضبطگی کے اختیارات مل گئے، پٹرولیم مصنوعات کی آئی ٹی بیسڈ ٹریکنگ متعارف کرائی گئی ہے، خلاف ورزیوں پر سخت سزائیں اور جرمانے بڑھا دیئے گئے ہیں۔
علاوہ ازیں قانون پٹرولیم شعبے کی ریگولیشن کو جدید بنانے اور شفافیت بڑھانے میں مددگار ہوگا، قانون سے سمگلنگ اور ٹیکس چوری کے خلاف سرکاری اقدامات مزید مؤثر ہوں گے۔
